السيسي يكلف الحكومة بتأهيل شباب مصر في العلوم التكنولوجية

وجه الرئيس عبدالفتاح السيسي، بالاهتمام بالعلوم التكنولوجية الحديثة والذكاء الاصطناعي وتأهيل الشباب المصري لهذا القطاع.

وقال السيسي، خلال اختبارات كشف الهيئة للطلبة المتقدمين للالتحاق بالأكاديمية العسكرية المصرية والكليات العسكرية، “إحنا معنيين بطلبة وطالبات الحاسبات الموجودين في مصر وشايفين عندهم المهارات والكفاءات التي تمكنهم أنهم يبقوا أكثر تخصصًا وأكثر احترافية في هذا المجال”.

وتابع السيسي قائلًا: "إحنا مستعدين في الاختبارات اللي هنعملها كاملة أن يكون فيه نسبة منهم معانا خلال العام ده".
وأضاف السيسي: "حبيت أؤكد الكلام ده وإحنا هنا علشان لو هتستانفو أو تفتحوا مرة تانية لمدة أسبوع عشان ندي فرصة لآخرين، يبقا إنتم محتاجين بس لجنة هتعمل الاختبارات".

وأكمل السيسي: "كلامي للناس اللي بتسمعنا في مصر إحنا في خلال هذا العام هنقبل من 2000 لـ2500، بحيث أن إحنا نديهم خلال سنتين ماجستير وكمان يبقى عندهم فرصة من خلال وزارة الاتصالات والشركات المتخصصة في المجال أنها تدي تكليفات وشغل يبقي فرصة للتدريب للي هليتحقوا معانا".

وتابع: "خلال السنتين دول هيبقي المتقدم في دراسة داخلية وهياخد جرعة علمية مكثفة وهيدرس لغات عشان يوصل لمستوى جيد ونختصر له الوقت، بدل ما ياخد أربع سنين وياخد دورات".
وواصل: "ده مش هيبقى سنة ولا اتنين ده هيبقي مسار إحنا شغالين عليه لسنين طويلة مش مرحلة مؤقتة".
وأكمل السيسي بقوله: "الدولة والقوات المسلحة هي اللي هتعمل الكلام ده خدمة لمجتمعنا وأهلنا".