بين الحياة والموت.. تفاصيل إجراء أحمد فهمي لعملية قلب مفتوح

كشف الفنان أحمد فهمي تعرضه لأزمة صحية خطيرة استدعت خضوعه لعملية قلب مفتوح، ما أدى إلى تحول جذري في رؤيته للحياة.

وقال أحمد فهمى فى برنامج “كلام نواعم”: "بحب أهتم بنفسي وبجسمي جدا وأروح الجيم وأكل كويس، في 2016 كنت أول مرة اشتغل مسلسل لرمضان وأخلص قبل رمضان لإن عادةً بنخلص تصوير في رمضان، خلصت قبله بكام يوم وأنا بحب الحلويات أوي ورمضان بقى كنافة وقطايف لقيت نفسي بزيد على الميزان قلت أروح للدكتور عشان أظبط الأكل، وهو بيكشف عليا عمل ريأكشن كده حاول ميبينوش بس أنا فهمت وطلب مني تحاليل".

تفاصيل إجراء العملية القلب المفتوح

وأوضح أحمد فهمي: “عملت التحاليل رجعت له قالي أنت عندك حاجة في القلب قلت له إزاي المفروض أحس بأعراض، قالي محتاجين نكشف، كشفت في حاجة اسمها الصمام الميترالي عندي فيه قطع بسبب العصبية، سافرت وعملت عملية قلب مفتوح في إنجلترا فجأة في اللحظة دي شوفت الحياة بمنظور مختلف تماما الدكتور وهو معايا دخلنا أوضة العمليات عشان يشرحلي قالي السرير دا أنت ممكن بعد ساعتين تقوم وممكن لأ بيتكلم عادي أنا مأخدتش الكلمة أنها حاجة وحشة وأخدتها بطريقة إيجابية بس من اللحظة دي بقيت بشوف الحياة بمنظور مخالف وأن الواحد بيلهث على أشياء ممكن تكون مش مهمة أوي”.

أحدث أعمال أحمد فهمي

يشار إلى أنه قد عُرض للفنان أحمد فهمي مؤخرًا مسلسل "بين السطور"، حيث حقق من خلاله نجاحًا كبيرًا ولاقى ردود فعل إيجابية من الجمهور والنقاد أثناء وبعد العرض.

مسلسل تليجراف

ويعمل النجم أحمد فهمي، حاليًا، على تصوير مشاهد مسلسله الجديد، الذي يحمل اسم "تليجراف"، الذي من المقرر عرضه في السباق الرمضاني المقبل 2025.

“تليجراف” هو اسم غير نهائي للعمل، وتعمل الشركة المنتجة على ترشيح واختيار باقي أبطال العمل الدرامي القائم على أحداث اجتماعية يتم تقديمها في إطار من التشويق والإثارة.