بحبها أوي.. داليا مصطفى تكشف سبب غيابها عن جنازة عمتها ناهد رشدي

كشفت الفنانة داليا مصطفى، تفاصيل علاقتها بعمتها الفنانة الراحلة ناهد رشدي، وسبب تغيبها عن جنازتها.

وقالت داليا مصطفى خلال لقائها الإعلامي عمرو الليثي مقدم برنامج "واحد من الناس": "كنت بحب عمتو أوي، وهي ست جميلة بشكل لا تتصوره، طيبة لأبعد الحدود، وأنا ماشوفتش في حياتي زي عمتو في الحتة دي، جدعة وحنينة وغلبانة أوي، بشكل مؤلم".

وأضافت "في مرة كنا بنشتغل مع بعض مسلسل، وقلت لها خلي بالك الإنتاج دا كويس أوي وناس محترمة، فأرجوكي زودي أجرك، وكلمتها قلت لها عمتو اتفقي على أجر كويس، قالت ده أنا مضيت بكذا، قلت لها هتجنيني هو ده أجر أصلا، فقالت لي خلاص بقى يا داليا".

سبب غياب داليا مصطفى عن جنازة ناهد رشدي

وأشارت إلى أن سبب غيابها عن جنازة عمتها الفنانة الراحلة ناهد رشدي، قائلة: "الناس عابت عليا أني محاضرتش جنازتها، بس أنا كنت مسافرة بس أنا جيت تاني يوم على طول العزاء، والناس مش متخيلة هي قريبة مني إزاي دي هي زي أمي، ويمكن خالص خالص عمرنا ما كنا بعاد عن بعض، وكنا قريبين من بعض".

وأردفت: "مشكلتها هي طيبة أوي، وفي الوسط بتاعنا اللي هو ماينفعش تبقى طيب قوي، ماينفعش خالص، لازم يبقى فيه حدود للطيبة ومش في الوسط بس في المجتمع كله لأن لما بتبقى طيب أوي بتكون مستباح".

وفاة الفنانة ناهد رشدي

أعلنت دينا سعد، ابنة الفنانة الراحلة ناهد رشدي، وفاتها في 14 سبتمبر الماضي، وذلك عبر فيسبوك، ليودّع الوسط الفني وجمهورها أحد أبرز وجوه الشاشة المصرية.