حسين أبو حجاج يكشف حقيقة مشاركته مع أحمد مكي في "الغاوي" برمضان 2025

كشف الفنان حسين أبو حجاج، حقيقة مشاركته مع الفنان أحمد مكي في مسلسله المرتقب “الغاوي” ضمن السباق الدرامي في رمضان 2025.

كما تحدث أبو حجاج عن تطورات حالته الصحية وحقيقة اعتزاله الفن، ومدى قوة صداقته بالفنان أحمد مكي عقب عملهما معا في مسلسل “الكبير”.

وقال أبو  حجاج، في تصريحات خاصة لـ“تليجراف مصر”: "الحمد للَّه رب العالمين، أنا تمام، وتعب رجلي أحسن من الأول، ولا أزال أمارس عملي الخاص في الورشة الحمد للَّه، وأنا مش بشتغل بإيدي، بروح أقعد والصنايعية شغالين، وابني ماسك التجارة بتاعتي، والدنيا شغالة زي الفل الحمد للَّه".

أحمد مكي مسلسل “الغاوي” 

وأضاف: “أنا لست مُشاركًا في مسلسل ”الغاوي" مع أحمد مكي في رمضان 2025، وهو عارف إن أنا عملت معه الكبير بالعافية، وهو لم يعرض عليَّ الشغل، أنا كنت متفق معه إن آخر حاجة الكبير، وقالي براحتك لما نخلص الكبير، وهو كان حاسس وشايف إن مش قادر أدوس على رجليَّ".

علاقة أبو حجاج وأحمد مكي

وعن علاقته بأحمد مكي، قال حسين أبو حجاج: “في حب واحترام متبادل، هو إنسان يستاهل بصراحة، شخص زيه بيدخل اللوكيشن الناس كلها بتحبه، وعمره ما زعل حد وبيحب الناس كلها، فمن حقه نقول عنه كلام حلو".

وتابع: "دايمًا على تواصل أنا وهو، ولسه واللَّه بعت لي رسالة أول إمبارح بيقولي وحشتني طمني عليك، وأحمد الوحيد من الفنانين اللي الواحد اشتغل معهم بيتواصل معايا، وهو شخصية جميلة”.

اعتزال حسين حجاج

وأضاف: “أنا أخدت قرار الاعتزال من أيام مسلسل الكبير في الجزء السادس، ساعتها أحمد قالي عارف إنك مش قادر بس عايزك معايا".

وزاد: "وهو كان بيقدّر ظروفي، لأن كان اشتد عليَّ التعب، وفي الجزء السابع مقدرتش بسبب رجلي، وقعدت في اللوكيشن فقالي خلاص، ووقف جمبي وخلى عقدي مشي للنهاية”.

عدم وجود صداقات لـ حجاج مع نجوم الفن

وأضاف الفنان حسين أبو حجاج: “التصريح المتداول في الفترة الأخيرة بأني مش هشتغل غير مع أحمد مكي، قديم وقلته في التليفزيون، بس محدش زعلني وكل اللي اشتغلت معهم حبايبي، وكانوا بيتعاملوا معايا باحترام، وأنا كمان بعاملهم باحترام".

واستطرد: “الحمد للَّه محدش جه في يوم وزعل مني من أول سمير غانم ونور الشريف - اللَّه يرحمهم - والفنانين الشباب في احترام متبادل، وكل الفنانين اللي اشتغلت معهم بعد ما ينتهي العمل مفيش صداقة، خلاص هو قضى مصلحته وخلاص”.

واختتم أبو حجاج: "أما أكتر واحد بيتواصل معايا أحمد مكي، والأستاذ هاني رمزي بصفته بلدياتي من بني مزار، والفنان أحمد آدم دول اللي معهم تواصل".