كرامب ترامب

 من غير ما نتكلم كتير علشان تكون واضحة الحقيقة، في دماغي كام سؤال خطير على وضع دولتنا الشقيقة، هو الكرامب ده من ترامب؟ واللا المخطط جه في دقيقة؟..
افتح يا سيدي القوس وفوت على كام مخطط للصهاينة، لا مؤاخذة مش تفكير يهود أصل اليهود فيهم طلاينة، ويا ما روس على أمريكان وف كندا والألمان كمان، الكارثة هنا مش دين شعوب الكارثة فيهم لو صهاينة..
وأهو التاريخ كان خير شاهد على كام رئيس عاصروا القضية هات أجنبي لا مؤاخذه واحد قال ع الأراضي فلسطينية، ده مفيش رئيس منهم نطقها الكل قسمها بحدود، حتى اللي سابها وقال قضاءها وقّف لها على البيت جنود، وع الكنائس والجوامع عاشت سنين على مُر حال، وعشان خلاص الكل جامع على إن شعبها ياما شال، كل لما تغضب أو تثور نوقف لها ستين طابور وما يهدأ لينا في لحظة بال..
طب إيه الجديد ما هو ده التاريخ؟! إيه اللي لسه ما اتكتبش، ما ف كل سطر في صوت صَريخ ولسه النهار فيه ما اتولدش، هقول لك أنا إيه الجديد أصل الجديد هنا في المفاجأة، الخطة معروفة وأكيد مكتوبة ومن زمان.. موافقة؟ لكن الجديد هنا جاي بيجري وطريقه واضح من ترامب، أصل النتن ياهو بيغلي ف ترامب فكر في الكرامب، أيوه.. كرامب ترامب واضح وسيناريو مكتوب من زمان، بعد أما موّت شعب كادح قرر يمحيه من الكون كمان، وطلب المساعدة والأخوة قال للعرب: عشان أنتوا أهل، أمان أخوك مش بيته هوّ.. في بيتك أنت أمانة سهل، ويا مصر ويا أردن ويااااا أنا برضه واقف بالقروض، سدّاد تملي معاك ودااااا متشال أكيد وقت الشروط، ياااااه ع الدماغ العالية ديّه ده باينّه كيف منقوع قرود..
طب بص بقه يا ترامب بيه الشعب ده أسّس حضارة، عايش عليها سنين وإيه.. علّمها ليك وللغير منارة، ولو وقفت قصاد رئيسه هتشوفه قائد أو بطل، واقف يحارب وسط جيشه ما هو ابن جيش أعظم وطن، وإخواتنا وفلسطين هتفضل وعلى أرضها قبر وسكن.