هيدي كرم: "اتطلقت عشان مكنتش مرتاحة وقراري له تمن"

علقت الفنانة هيدي كرم على انفصالها عن زوجها، مشيرة إلى أن الطلاق وقع لأنها لم تكن تشعر بالراحة، وأنها هي التي اختارت.

وأضافت هيدي كرم، خلال برنامج صبايا الخير تقديم الإعلامية ريهام سعيد المذاع على قناة النهار قائلة: “اتطلقت لأن وصلت لمرحلة مكنتش مرتاحة ومش حاسة أن إحنا واصلين لبعض، وأنا اللي اختارت”.

وتابعت “أنتي بقيتي واحدة تانية وفهمتي نفسك يمكن  الوضع مبقاش مناسب ليكي بعد النضج، يمكن ميبقاش العيب في الشخص أصلًا".

الست عليها جزء من المسؤلية في طلاقها

وأردفت “أي ست بتطلق جزء من المسؤولية يقع عليها لأنها معرفتش تصلح الأمور، لو مكانش الراجل فيه عيوب شنيعة”.

وتابعت “أنا اختارت سعادتي ومش زعلانة اختارت سعادتي دلوقتي مش بعدين ولازم أتحمل جزء من القرار، وقرار الانفصال ده له تمن، وإلى حد ما أكيد فيه أنانية، في ستات كتير بيعيشوا حياة غير سعيدة علشان خاطر الأولاد”.

ابن هيدي كرم

واصلت “ابني عمره ما عاتبني بسبب الانفصال ساعات لما نختلف بيقولي أنتوا اختارتوا الحياة دي، وبيحطني قدام نفسي مزعلتش لما قرر يعيش مع باباه لأنه له فيه زي ما ليا حرام وباباه محتاج وجوده”.

وأكملت “ابني حاليا عايش لوحده عنده 25 سنة كان عايش معايا لحد لما بقى عنده 13 أو 14 سنة وبعد كده عاش عند باباه فترة وبعد كدة عاش خارج مصر سنة، وبعد كده رجع وعايش لوحده”.

واستطردت “لما عاش مع باباه مزعلتش يمكن كان محتاج الأب يكون موجود لأن بحكم الحال باباه كان يبقى عنده شغل كتير ومكنش بيشوفه كتير وممكن يكون محتاج راجل يلعبوا بلايستيشن ويتكلموا ويهزروا مزعلتش بس كان بيوحشني".