رد فعل دكتور على خبر وفاة شقيقه: "جبتوا رقمي منين؟ عندي محاضرة"

شهدت منطقة وسط البلد بالقاهرة واقعة مأساوية عندما توفي مسن أثناء سيره بالشارع، لكن الصدمة جاءت من رد فعل أشقائه عندما اتصل بهم الأهالي للحضور لاستلام جثمان شقيقهم.

وقالت الصحفية نور الهدى زكي عبر منشور على صفحتها الشخصية بفيس بوك: “من ساعات قليلة كنت أسير أنا وحياة الشيمي من شارع الشريفين عند الإذاعة القديمة في طريقنا لنقابة الصحفيين.. فجأة شاهدنا رجل كبير يقع على الأرض، تجمع الناس وأحضروا كرسيا وأقعدوه عليه.. وبسرعة ولاد البلد اللي كلهم خير وطيبة عابرين من المكان وموظفين أحضروا زجاجة مياه وحباية تمر.. والحكاية والراوية.. وأنت كويس يا حاج؟.. والحاج مابيردش”.

وأضافت “أسندنا رأسه وبادر البعض في تدليك صدره.. والحاج مابيردش.. أحدنا قال: ربما غيبوبة سكر.. والحاج مابيردش.. فاتت 5 دقايق.. السر الإلهي طلع.. واسترد الله وديعته.. ولا إله إلا الله، واحد جاب البطانية وغطى الحاج.. فين الموبايل.. تقدم أحدنا أخرج الموبايل.. فين البطاقة.. اسمه إيه يا أستاذ اسمه.. جاءت سيارة الإسعاف”.

وتابعت “ تقدم المسعف وقام باللازم، وأكد وفاة الرجل.. تقدم آخر ومن آخر تليفونات ورسائل  اتصل، ردت أخته تعالى فورا.. أجي إزاي أنا في العبور وعندي سكر ولازم أنتظر زوجي طيب.. أخته التانية.. تعالي فورا أخوك اتوفى في الشارع.. أنا في القليوبية.. طيب”.

وواصلت "آخر رقم معنا رد علينا.. حضرتك الدكتور.. أيوه: مين معايا.. أنا فلانة.. أخو حضرتك مات حالا في الشارع.. في وسط البلد.. حضرتك تعالى فورا أنت جبت تليفوني منين؟.. نعم: بقولك أخوك مات وإحنا في الشارع تقول لي: جبت تليفوني منين  تعالى فورا .. أجي إزاي أنا لسه داخل سألقي محاضرة في أكاديمية بالدقي
بقولك أخوك مات في الشارع.. ماااااات، أقول لك تاني أخوك ماااااات.. استأذن فورا يا دكتور.. أستأذن إزاي، هو أنا في طابونة.. يا راجل الموت مافهوش محاضرة.. يا رجل أخوك مرمي في الشارع والإسعاف موجود والبوليس وصل.. طيب حأحاول".

وأكملت "فاتت ساعة وماجاش وفاتت ساعة كمان
واتصلت به أنت مجتش ليه يا دكتور أنا مش لاقي تاكسي.. الموقف إيه عندك دلوقت الموقف إيه.. نعم؟، أنت بتسألني الموقف إيه؟ روح يا شيخ.. ربنا ينتقم منك ويقعدهولك في صحتك أغلق الهاتف في وجهي.. وسمعني أحد الطيبين فقال لي: سيبيه، دا ربنا مش رايد له الرحمة. ولم يحضر إلى الآن، ومضت ساعات خمس تقريبا". 

وختمت “وبعد 5 ساعات جاءت أخته وزوجها بعد 5 ساعات واستلموا المتوفى.. من الشرطة والناس الطيبين”.