تكريم وكيل النائب العام نجيب محفوظ لتميزه في أداء عمله

استقبل المحامي العام الأول لنيابة جنوب الجيزة الكلية، بمكتبه، نجيب محفوظ، وكيل النائب العام بنيابة قسم الجيزة، وأعرب عن تقديره العميق للجهود الكبيرة التي بذلها في أداء مهامه على أكمل وجه.  

إشادة وتقدير

أشاد المحامي العام الأول بما قدمه نجيب محفوظ، من تفانٍ في العمل وتميز في الإنجاز، وهو ما انعكس بشكل واضح على مستوى خدمة العدالة ومواكبة نبض الشارع المصري. 

وأكد المحامي العام، أن هذا التكريم يأتي في إطار تحفيز أعضاء النيابة العامة على الاستمرار في بذل المزيد من الجهد والعطاء، بما يضمن أداء الرسالة السامية للنيابة العامة على الوجه الأمثل.  

رسالة تقدير وتحفيز

وجاء تكريم وكيل النائب العام، نجيب محفوظ، تقديرًا لعطائه المخلص وجهوده الحثيثة في إنفاذ القانون وترسيخ العدالة، حيث جسد نموذجًا يحتذى به في الالتزام والجدية في أداء الواجب، بحسب بيان.  

وفي كلمة موجزة، أعرب وكيل النائب العام عن امتنانه لهذا التكريم، مؤكدًا أن التقدير الذي حصل عليه سيكون دافعًا له ولزملائه لمواصلة العمل الدؤوب والإخلاص في أداء المسؤولية الملقاة على عاتقهم.  

نهج مستمر في التقدير

أكدت النيابة العامة في بيان لها أن تكريم المتميزين من أعضائها يعد جزءًا من استراتيجيتها الرامية إلى تعزيز الأداء المهني ودعم الكفاءات القانونية التي تعمل بجدية على تحقيق العدالة وتلبية تطلعات المواطنين.  

وكان قد روى الصحفي أحمد شعراني، موقفًا نبيلًا جمعه بوكيل نيابة، تواصل معه، وساعده في رد مبلغ مالي كان قد سرق منه دون أن يحرر محضرًا ضد المتهمين.

الصحفي أحمد شعراني، تعرض في وقت سابق للنصب والسرقة تحت التهديد في منطقة البحر الأعظم بالجيزة.

ولم يحرر الصحفي، محضرًا بالواقعة، واكتفى بكتابة منشور عبر "فيسبوك" يروي خلاله ما حدث له.

بعد 13 يومًا من الواقعة تفاجأ الصحفي باتصال من مكتب وكيل نيابة الجيزة، الذي طلب منه الحضور مؤكدًا له أن المتهم مقبوض عليه ويقضي فترة الحبس.

وكيل النيابة قال للصحفي: “إحنا موكلين من ربنا عشان نجيب حقوق الناس ونحميهم”.

شعراني قال في منشور عبر “فيسبوك”: “صحيت إمبارح على رقم غريب بيرن كتير، فرديت عليه على اعتبار إنه ممكن يطلعوا بتوع سيلز العقارات، لكن لقيت حد بيتكلم بنبرة رسمية جدا وبيسألني؟، أستاذ أحمد شعراني؟ قلت له أيوه مين؟ قال لي معاك مكتب نجيب محفوظ وكيل نيابة الجيزة، ونجيب بيه عايز يقابلك ياريت تشرفنا النهاردة، ولحد هنا أنا مش فاهم فيه إيه؟، أو أنا عملت إيه؟”.

وتابع، “قمت لبست ورحت لهم، وهناك قابلت، وكيل النائب العام في الجيزة نجيب محفوظ، ولقيته بيقول لي أنا قريت البوست اللي أنت كنت كاتبه بتاريخ 4 مارس بخصوص تعرضك لسرقة بالإكراه في شارع البحر الأعظم، والحقيقة من صدق كلامك الموضوع ضايقني جدا، خاصة إنها دايرتي، وقررت أكلمك، وسألني: فاكر شكل اللي عمل فيك كدة؟، قلت له طبعًا، قالي قول والله العظيم أقول الحق، حلفت، راح مطلع لي صور مطبوعة للشخص اللي عمل كدة وفعلا طلع هو”.

وأضاف، “بعدها قال ليه معملتش محضر؟، قلت له أنا عارف إجراءات القسم معقدة شوية وقلت مش هتفيد بحاجة لأني حتى معرفش اسمه، قالي أطمن في ناس غيرك اتعرضوا لنفس الموقف واحد منهم على سبيل المثال اتاخد منه 20 ألف، وعملوا محاضر، ومسكناه، والصور دي أنا اللي مصورها له بنفسي وهو حاليًا محبوس على ذمة القضايا”.

وأكمل، “يومين كاملين تقريبًا قضيتهم في النيابة علشان نأخذ كل الإجراءات اللازمة، لكن كان ملازمني شعور، وهو إني كنت مستغرب جدا، اهتمام أنا مش متعود عليه، الناس متعرفنيش ولا رايح بواسطة، أنا عمري ما تعاملت مع النيابة أو القضاء عمومًا، لكن وكيل النيابة قال لي كلمتين بسببهم عرفت ليه الناس بتعظم دور النيابة والقضاء المصري وتصفه دايما أنه عظيم باختصار قال لي: ”إحنا موجودين في المكان ده موكلين من ربنا إننا نجيب حقوق الناس ونحميهم، وحالفين قسم بكده".

وتابع وكيل النيبابة: “وأنت أكيد لما تعرضت للموقف ده حسيت إنك في موقف ضعف، وده ميرضيناش، نام مرتاح حقك هيرجع، وأنت مش ضعيف أنت تصرفت صح علشان ده مجرم، وعنده تاريخ أسود، ومن ضمن اللي عمل فيهم كدة كانوا اتنين مع بعض رايحين يوردوا فلوس الشغل، وكان ممكن يتلموا عليه يضربوه، لكن قدر ياخد منهم الفلوس كلها وكانت 20 ألف جنيه”.

وأتم الصحفي حديثه بقوله، “أنا لو كنت خدت حقي بإيدي مكنتش هبقى حاسس الإحساس اللي أنا حاسه دلوقتي، فخور إني عايش في دولة فيها قانون، وكلمتين عايز أقولهم للناس اللي شتمتني أو اتريقت ووصفتني بأني ضعيف، إنك تبقى محترم وابن ناس ومش همجي ولا بلطجي ده اختيار مش ضعف، وربنا قبل القانون مش هيسيبك، شكرًا لكل حد عمل شير للبوست وتحية كبيرة لرجال النيابة العامة المصرية وتحيا مصر".