تأجيل محاكمة المتهمين بقتل شقيق محامٍ بشبرا الخيمة إلى 25 مايو

أجلت محكمة جنايات شبرا الخيمة، اليوم،ت أولى جلسات محاكمة المتهمين في واقعة قتل الشاب خالد، شقيق المحامي وليد التميمي، أسفل الطريق الدائري لجلسة 25 مايو المقبل . 

وكشفت هند سعيد زوجة المجني عليه عن تفاصيل الواقعة في التحقيقات خلال حضورها لسراي النيابة.

وحصلت "تليجراف مصر" على نص التحقيقات وجاءت كالتالي:

س: ما سبب حضورك لسراي النيابة؟

ج: انا جيت النيابة عشان عايزه أقول اني اتعرفت على جثمان جوزي بمشرحة زينهم.

س: وما هي بيانات المتوفي إلى رحمة الله؟

ج: هو اسمه / خالد مجدي شافعي توفيق وهو عنده 31 سنة.

س: وما هي علاقتك بسالف الذكر تحديدًا؟

ج: هو جوزي.

س: وما هي معلوماتك بشأن الواقعة محل التحقيقات؟

ج: "اللي حصل أن جوزي / خالد مجدي شافعي توفيق كان رجع من الشغل بتاريخ 2024/8/21 وحوالي الساعة 2:10 صباحًا لقيته اتصل عليا وقالي انا راجع من الشغل وجيت اركب توكتوك قالي 30 جنيه وهو ما كانش معاه فلوس غير 45 جنيه وعايز يروح إمبابة عند أمه وفضل يكلمني على التليفون لحد ما سمعت صوت حد بيقوله الساعة كام وهو رد عليه وقاله 2:30 وفضل ماشي وهو بيكلمني في التليفون لحد لما حد تاني ساله قاله الاستيراد منين قاله معرفش كمل معايا على التليفون وبعد كده سأل واحد وقاله الدائري منين فسمعته قاله سيب أول سلم واطلع تاني سلم وبعد كدة فضل معايا على التليفون لحد ما سمعت صوت حد بيقول لجوزي صوته تخين وصوت حد تاني بيقوله أقف يالا وشتمه وقاله مش بقولك أقف وشتمه تاني".

وأكملت: "بعدين سمعت صوت خالد جوزي بيقول للناس من غير ضرب وبيصرخ وبيقوله معايش حاجة تاخدوها انا معايش حاجة ولقيت خالد بيصرخ ويقول قتلوني ياهند وخدو حاجتي اشهد أن لا اله الا الله والخط قطع بيني وبينه وحاولت اتصل به تاني كان بديني جرز بس محدش كان بيرد عليه لحد الساعة 5 الصبح ومعرفتش حاجة عن جوزي وبعدين لقيت تلفونه اتقفل وكلمت اخوه وامه محدش عارف عنه حاجة".

وتابعت: "تاني يوم كلمت النجده علشان اعرف جوزي فين ومعرفتش أوصل لحاجة ويوم 2024/8/23 اخوه وليد كلمني وقالي دورت علي خالد في المستشفيات والاقسام ما وصلتش لحاجة لحد ما رحنا مشرحة زينهم نسال علي جوزي وهناك شفت جثة واتعرفت عليها أن ديه جثة جوزي وكمان اخوه وليد اتعرف عليه واخوه وليد راح قسم تاني شبرا الخيمة وعمل محضر انه اتعرف علي جثة جوزي خالد والنهاردة جيت علي النيابة علشان أقول اقوالي واخد تصريح بدفن جثمان جوزي وده كل اللي اعرفه".

س: ومتى كانت مكالمتك مع المتوفي إلى رحمة الله؟

ج: أنا كلمته يوم 2024/8/21 حوالي الساعة 2:10 صباحًا.

س: وأين تحديدًا كان المتوفي إلي رحمة الله تعالى حال مكالمتك الهاتفية له؟

ج: هو ساعة لما كلمني كان لسه خارج من الشغل ورايح علي إمبابة.

س: وأين مكان عمل سالف الذكر تحديدًا ؟

ج: هو شغال في سوبر ماركت البان الصالح اللى في شارع الحجاز ميدان المحكمة مصر الجديدة.

س: ومتى تحديدًا انقطع الاتصال بينك وبين المتوفي إلي رحمة الله؟

ج: في نفس اليوم حوالي الساعة 3:15 صباحًا.

س: وهل نما إلي علمك مكان تواجد المتوفي إلي رحمة الله خالد حدوث تلك الواقعة؟

ج: اللي اعرفه أن هو قالي هطلع الدائري اتجاه الوراق واركب عربية اروح أمبابة.

س: وما هو رقم الهاتف الذي كنت تتحدثي به مع المتوفي الي رحمة الله؟

ج: انا كنت بكلمه علي تليفونه.

س: وما هو وصف الهاتف المحمول الخاص بزوجك؟

ج: هو تليفون ماركة نوكيا لونه أزرق في أسود وكان معاه تليفون تاني في خط تاني ماركة نوكيا لونه أبيض

س: وهل تحدثتي مع زوجك المتوفي إلي رحمة الله علي خط آخر خلاف الذي كنتي تتحدثين معه عليه؟

ج: انا بعد ما الخط قطع اتصلت على الرقم التاني وكان بيدي جرس حوالي اربع مرات بس محدش رد وبعدها اتقفل.

س: ومتى تحديدًا علمتي بوفاة زوجك المجني عليه؟

ج: بتاريخ 2024/8/23 حوالي الساعة 10 مساءً.

س: وما هي كيفية علمك بوفاة سالف الذكر؟

ج: هو يوم 2024/8/23 أخوه وليد كلمني وقالي دورت على خالد في المستشفيات والأقسام ما وصلتش لحاجة
لحد ما رحنا مشرحة زينهم نسأل على جوزي وهناك شفت جثته.

س: وهل تتهمي ثمة احد بقتل المجني عليه زوجك / خالد مجدي شافعي؟

ج: ايوه الناس اللي انا سمعت صوتهم في التليفون انهم هما اللي قتلوا جوزي وسرقوا حاجاته.

س: وما هي المنقولات التي تم سرقتها من المتوفي إلي رحمة الله؟

ج: هي عبارة عن شنطة كروس لونها كاكي فيها محفظته والأدوية اللي بياخدها وساعة يد رجالي فضى اللون لها اسورة أسود مطاط ماركة باتيك فليب وحظاظة ماركة حجر كريم فيروز وخاتم فضه عقيق وعدد اتنين جهاز تليفون ماركة نوكيا.

س: وملك من تلك المنقولات؟

ج: هي ملكه هو.

س: وبكم تقدر قيمة تلك المنقولات؟

ج: بحوالي 120 ألف جنيه.

س: وهل توجد ثمة خلافات بين المتوفي إلى رحمة الله وثمة شخص؟

ج: لا هو كان في حالة.

س: وما قولك فيما سطره المقدم / أحمد العربي مأمور قسم ثان شبرا الخيمة بمحضرة المؤرخ 2024/8/21 ؟
ج: هو جوزي واللي حصل انا قولت عليه.

س: هل لديكي أقوال أخرى؟

ج: لا.