عبد الحفيظ لإدارة الأهلي: أحتاج تفسيرا لهذا القرار

أثار الكابتن سيد عبدالحفيظ، مدير الكرة السابق بالنادي الأهلي، حالة من الجدل والتفاعل الواسع على مواقع التواصل الاجتماعي، بعد تصريحاته الأخيرة التي أدلى بها بشأن قرار مجلس إدارة الأهلي بالانسحاب من مباراة القمة أمام الزمالك، وما تبعه من خصم ثلاث نقاط من رصيد الفريق في الدوري.

"أنا مش ضد القرار.. بس محتاج أفهمه"

وقال عبدالحفيظ، في تصريحات تليفزيونية لبرنامج “الكورة مع فايق” على قناة MBC: "أنا ممكن أكون مختلف مع رأي الأهلي، لكن في النهاية أنا مع القرار، بس كمشجع أهلاوي، محتاج حد من النادي يطلع يشرحلي أسباب اتخاذ القرار، مش مجرد بيان وخلاص، ليه متوجهناش للملعب؟ وليه اتخصم مننا 3 نقاط؟".

وأضاف: "الزمالك وبيراميدز عندهم كامل الحق إنهم يروحوا أي ملعب، بس أنا مش مستوعب إن نقطة تتشال مني بدون ما أفهم السبب بوضوح".

 اللائحة.. ومبدأ التطبيق على الجميع

وتطرق عبدالحفيظ في تصريحاته للحديث عن مبدأ العدالة وتطبيق اللوائح، قائلاً: "اللائحة دي من زمان مش بتتطبق في انسحابات الزمالك، واللي حصل قبل كده معروف، فلو إحنا غلطانين خلاص، نحط لسانا في بوقنا، بس محتاج حد يشرح لي إزاي بتتطبق مرة ومرة لأ؟".

 "لا أثق في وعود الرابطة واتحاد الكرة"

وفي جملة صريحة قالها عبدالحفيظ: "أنا لا أثق في وعود الرابطة ولا اتحاد الكرة، لأنهم لسة بيديروا الأمور بطريقة قديمة جدًا، مفيش وضوح، ومفيش إدارة أزمة حقيقية".

كما وصف ما يحدث بـ"الفوضى"، مؤكدًا: "المشهد كله في أزمة القمة عبارة عن فوضى، اتحاد الكرة والرابطة بيضربوا في بعض، وفي الآخر إحنا كأندية بندفع التمن".