"سم في الكشري".. ننشر نص اعترافات "سفاح الدخيلة"

حصلت “تليجراف مصر” على نص أقوال المتهم بارتكاب جريمتي قتل بشعتين راح ضحيتهما شابان بالإسكندرية أحدهما صديقه القديم من مسقط رأسه بمحافظة سوهاج.

س: ما تفصيلات إقرارك بارتكاب واقعة مقتل شاب يُدعى حامد سالمان؟

 ج: الحكاية إني أعرف حامد من 7 سنين لأنه من نفس البلد بتاعتي "المدمر" في طما، كنا بنقعد سوا على القهوة نشرب شاي ونتكلم، بس ماكنّاش أصحاب قوي ولا فيه بينا شغل، أنا كنت مديون ومزنوق في فلوس، وفكرت آخد التروسيكل بتاعه، في يوم شفته، وقلتله نطلع الوكالة نعمل مصلحة، هو وافق، ومكنتش قايل له هنعمل إيه بالضبط هو كان واثق فيا جدًا، وماسألنيش حتى عن تفاصيل “المصلحة”،  تاني يوم جالي المحل من نفسه وقالي "يلا نروح"، وأنا ساعتها كنت ناسي، لكن قلت خلاص نمشي في الموضوع.

س: متى قررت قتله؟

ج: لما مشينا على الطريق، كنت بفكر في الطريقة، وخوفت أضربه أو أستخدم سكينة، ففكرت في السم، رحت محل مبيدات جنب الوكالة وقلت لصاحبه إني عايز سم للفئران، إداني كيس فيه مادة سوداء زي التراب بـ30 جنيه.

س: وماذا فعلت بعد شراء السم؟

ج: روحت على محل الشيخ سامي، اشتريت علبتين كشري، فتحت واحدة منهم، حطيت فيها شوية من السم، وعلمتها، واديتها لحامد، وأنا خدت العلبة التانية، وبعد ما بدأ يأكل، قالي إن طعم الكشري وحش، فقلتله يرميه، وأنا كمان رميت طبقي بس هو كان أكل حوالي 3 معالق.

س: متى بدأت تظهر عليه علامات التسمم؟

 ج: وإحنا ماشيين على الطريق الصحراوي، بدأ يتعب ويدوخ، ونام في الصندوق ورا قربت من كبري أبو الخير، ووقفت على جنب الطريق، وبصيت عليه، لقيته خلاص مش بيتكلم، نفسه قطع.

س: هل كنت متأكد من وفاته؟

 ج: لا، بس خوفت يفضل عايش ويبلغ عني لو فاق، فلقيت حبل أخضر في التروسيكل، لفيته حوالين رقبته وخنقته جامد لحد ما اتأكدت إنه مات.

س: كيف تخلصت من الجثة؟

ج: كنت راكن التروسيكل بالعرض، نزلته في الزرع جنب الزبالة، وسِبت الجثة هناك، وعديت الناحية التانية من الطريق، كنت ناوي أرجع العامرية، لكن رجعت تاني، وخدت التروسيكل.

س: ماذا فعلت بالتروسيكل؟

 ج: طلعت على "جمال الشافعي"، ده راجل كنت أعرفه عن طريق ميكانيكي، عنده صالة بيشتري منها تروسيكلات. وأنا في الطريق فتحت درج التروسيكل، لقيت الورق كله فيه.

وتُنظر يوم 9 أبريل الجاري أولى جلسات محاكمة المتهم المعروف إعلاميًا بـسفاح الإسكندرية الجديد، أمام محكمة جنايات الدخيلة بمحافظة الإسكندرية، في قضية اتهامه بقتل شابين خلال 10 أيام فقط بدافع السرقة، بحسب ما ورد في أمر الإحالة الصادر عن النيابة العامة.

وتُعقد الجلسة برئاسة المستشار أحمد محمود إبراهيم، وعضوية كل من المستشارين تامر عادل وفائي ومحمد توفيق محمد، بحضور ممثل عن النيابة العامة، بالإضافة إلى الطبيب الشرعي الذي سيعرض تقاريره ضمن أدلة القضية.