زيزو مفجرا مفاجأة: "لم أوقع لأي نادي واللي معاه حاجة يطلعها" (فيديو)

كشف نجم نادي الزمالك، أحمد السيد “زيزو”، تطورات ملف تجديد عقده مع النادي الأبيض، موضحًا تفاصيل هامة بشأن انتقاله إلى النادي الأهلي بالتوقيع للقلعة الحمراء.

وقال زيزو عبر ستوري على إنستجرام: "الحمد لله أنا راجل بحترم كل الناس، لكن للأسف عدم ردي على المعلومات المغلوطة والتزامي الصمت زاد عن حده، كل ساعة خبر عن توقيع أو تجديد عقد زيزو، وكل واحد بيغازل الشريحة اللي عايزها من الجمهور".

وأضاف: "بكل وضوح أنا لم أوقع لأي نادي، سواء داخل أو خارج مصر، اللي حصل على توقيعي يتفضل يعلن، إذا كان كلامه صحيح؟، كمان اللي عنده دليل على توقيعي لأي نادي برضو يتفضل يطلعه على الملأ".
 

وتابع: "الناس لازم تعرف كويس، أنا بقدر جدًا الكيان الكبير اللي أنا بلعب فيه، ولا يمكن أنكر فضله عليا، لكن فيه حاجة أنا مكنتش حابب أتكلم فيها خالص، لأنه للأسف الأمور في الإعلام كلها في اتجاه واحد".

وأوضح: "ليه محدش اتكلم عن حقوقي المشروعة زي أي لاعب في الدنيا، ليه محدش اتكلم إن الناس سابتني بقالها شهور طويلة ومش عايزين يجددوا عقدي، ليه محدش اتكلم عن المستحقات المتأخرة اللي ليا بقالها كتير. ومش لاقي حد يجاوبني ليه محدش اتكلم إنه التجديد المرة دي جاي في مرحلة متقدمة من عمري بالنسبة للعيبة الكورة، ولعيب الكورة مهما طول عمره قصير في الملعب".

وواصل: "محدش كمان اتكلم إنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود، ورغم كل ده قلت وهفضل أقول أنا منتظر كلمة النادي، ورد الاعتبارات كتير مش لتجميل الصورة، والجماهير لازم تكون عارفة الحقيقة، زيزو مش بيزايد ولا بيتاجر، لكن لازم الطرف الثاني يكون عايزني أكمل، وتكون فيه استجابة لحاجة من المعروض عليا على الأقل". 

وأردف: "لكن للأسف الكلام معايا حاجة، واللي بيتقال للإعلام حاجة تانية، أنا مينفعش أجرح في حد ولا أتكلم في حق حد، لأن اللي بيتقال في الجلسات عيب يتقال برا، على الأقل من ناحيتي".

وأكمل: “أنا مستني رد النادي لحد آخر يوم في الكونفدرالية، وأتمنى ربنا يكرمنا بيها أنا وزمايلي، وأي كلام هيتقال غير كده في موضوع التجديد أو التوقيع قبل الموعد ده، هيكون كلام غير صحيح”

وأتم: "ورسالتي الودية جدًا للمسؤولين في النادي، اللي أنا بحترمهم جميعًا، أتمنى الحوار في مسألة تجديد العقد يكون بيني وبينكم، مش عن طريق الإعلام، وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على إننا نكمل الطريق. شكرًا على تفهمكم موقفي".

تأكيدًا لـ"تليجراف مصر".. زيزو أهلاوي و"تأشيرة أمريكا" كشفته

ورغم نفي زيزو توقيعه لأي نادي، إلا أنه استخرج تأشيرة السفر إلى الولايات المتحدة الأمريكية، في خطوة تؤكد انضمامه رسميًا إلى صفوف الأهلي للمشاركة معه في بطولة كأس العالم للأندية 2025.

زيارة صباحية للسفارة الأمريكية بالقاهرة
 

كشفت مصادر لـ"تليجراف مصر"، أن زيزو تواجد صباح اليوم الثلاثاء، داخل السفارة الأمريكية بالقاهرة من أجل إنهاء إجراءات استخراج التأشيرة الخاصة به، استعدادًا للسفر مع بعثة الأهلي إلى أمريكا للمشاركة في المونديال المرتقب.

زيزو يوقّع للأهلي 4 مواسم في صفقة انتقال حر

أتم زيزو توقيع عقود انضمامه إلى النادي الأهلي لمدة 4 مواسم، في صفقة انتقال حر بعد نهاية عقده مع الزمالك، على أن يتم الإعلان الرسمي عن الصفقة في نهاية مايو المقبل.

زيزو يُلاعب الزمالك وينهي اتفاقه مع الأهلي

كشف مصدر مقرب من لاعب الزمالك ونجم منتخب مصر، أحمد السيد زيزو، حقيقة تهرب اللاعب من الجلوس في مفاوضات مع إدارة الزمالك واتفاقه مع الأهلي من عدمه.

عروض الزمالك لزيزو

وأكد المصدر في تصريحات لـ"تليجراف مصر"، أن زيزو رفض جميع عروض الزمالك المقدمة له، وأخرها حصوله على 80 مليون جنيه في الموسم الواحد، ويتهرب من جلسات المفاوضات.

وتابع المصدر: "كما أن زيزو أبلغ والده بعدم الجلوس على طاولة المفاوضات، دون الحصول على جميع مستحقاته المتأخرة".

زيزو في الأهلي

واختتم المصدر: "أن زيزو طلب غلق جميع المفاوضات معه بحجة التركيز في المباريات المهمة، وتوصل لاتفاق نهائي مع الأهلي للانتقال إليه بداية من الموسم المقبل".