أحمد زيزو.. الفتى الذي باع الزمالك بـ400 مليون!

في زمن الانتماء فيه بقى على قد الشيك، أحمد "زيزو" نجم الزمالك اللي الجماهير كانت بتغني له في المدرجات، لبس الفانلة الحمرا، ومشي في صفقة بـ400 مليون جنيه.

وأهو كمان والده – حسب الكلام اللي بيتم تداوله – قبض 35 مليون جنيه عمولة… عشان هو "بابا اللاعب"، وصاحب الفرخة اللي بتبيض الدهب!

بينما الزمالك لا شاف مليم! لا حق رعاية، ولا نسبة إعادة بيع، ولا حتى واجب عزاء!!

543 مليون جنيه في سنة واحدة… لولد لابس شورت وبيجري ورا كورة! وده ملخص توقيع زيزو للأهلي.

في بلد الناس فيها بتتخانق على العيش ،وتعاني من ارتفاع الأسعار والبنزين!

في بلد الطبيب والمهندس مرتباتهم 6 أو 7 آلاف، وملايين من شبابها مش لاقيين شغل أو حتى “دبلة ومحبس” يتخطبوا بيهم!وهو، زيزو، بيمضي عقد نصه كاش، ونصه تقدير ذاتي!

طيب تعالى نشوف الصفقات حوالينا، مثلا محمد صلاح، اللي رافع اسم مصر في العالم، عقده في ليفربول أقل من زيزو… لكن بيحقق بطولات وقيمته السوقية بالملايين بجد.

ورمضان صبحي  لاعب بيراميدز حاليا واللي ترك الأهلي عشان تأمين المستقبل، ومكملش غير موسمين والجماهير شطبته من ذاكرتها.!

حتي عبدالله السعيد، اللي خرج من الباب الضيق برضه عشان الفلوس، ولسه ناس كتير مش سامحاله رغم موهبته حتي الآن في الزمالك!

يعني إحنا مش بنتكلم عن أول لاعب يختار الفلوس، لكن إحنا بنتكلم عن لاعب كان بيتصدر مشهد "الوفاء والانتماء" ويوم ما مشي، مشي من غير ما الزمالك يستفيد بجنيه!

وبالنسبة للجمهور الأبيض كان بيهتف له، بيعلّق صوره، وكان شايف فيه "آخر رمق من الوفاء" وبعد التوقيع للأهلي نزع صورته من النادي !
ولما شافوا الصفقة، الصدمة كانت مدوية… كتير حسوا إنهم اتخانوا.

بعضهم كتب: "مفيش انتماء في الكورة خلاص".!والبعض التاني قال: "من حقه يدور على مصلحته"..!

بس تفضل الحقيقة إن مفيش لاعب – مهما كان – أكبر من النادي، وأكبر من جمهور وقف وراه في الهزيمة قبل النصر.! نعم نعم ..زيزو راح الأهلي؟ ماشي. بس هو كسب كام؟ وخسر إيه؟

تاريخه مع الزمالك بقى ملف مُغلق، وكان مرشح يتولي الراية بعد شيكابالا كرمز من رموز نجوم الزمالك وجمهور الأبيض، اللي كان بيهتف باسمه، بقى بيطالب بس بـ"كرامة النادي" اللي بقى مستباح.!

الطمع أكل كل حاجة، والإخلاص بقى سذاجة، والانتماء بقى حكاية من أيام زمان.!ولسه السؤال قايم:

في بلد كل حاجة فيها بتنهار، والناس مش لاقية تاكل..إزاي لاعب كورة بياخد نص مليار جنيه؟

وإزاي نادي بحجم الزمالك يتساب كده، من غير ما يدافع حتى عن حقوقه؟لله الأمر من قبل ومن بعد.

ويا ويلنا لو ربنا مرحمناش من كل هذا العبث!!