كريم فهمي: "مراتي بنت ناس وأنا رومانسي بس مش "ملزق"

تحدث الفنان كريم فهمي عن قوة العلاقة التي تربطه بشقيقه الفنان أحمد فهمي، مسترجعًا ذكريات الطفولة التي جمعت بينهما، ومؤكدًا أن رغم شقاوتهما في المدرسة، إلا أنهما كانا دائمًا عَونًا وسندًا لبعض في كل المواقف.

كانت متوازنة

وقال فهمي خلال لقائه مع الإعلامية لميس الحديدي في برنامج "كلمة أخيرة" على قناة ON: “أنا كنت تلميذ مسالم، وكنت أشقى من أحمد، بس شقاوته كانت بتعمل بلاوي! ومع كده كنا دايمًا في ظهر بعض، وفيه حكايات كتيرة من الطفولة ما تتحكيش”.

وأشار إلى أنهما لا يزالان يتشاركان الرؤى الفنية، وكان من المفترض أن يجمعهما عمل، لكن لم تتوافق المواعيد.

وردًا على سؤال الحديدي حول شخصية "فارس أبو العزم" في مسلسل "وتقابل حبيب"، وإن كان لها مثيل في الواقع، أجاب: "الرومانسية في شخصية فارس كانت متوازنة، مكنش ماشي يدلق رومانسية، لإن فيه رجالة بتتفرج كمان، فكان لازم فارس ميبقاش شخصية 'ملزقة'".

زوجته وبناته

وعن تشابه الشخصية مع أسلوبه في الزواج، قال: "أنا متجوز من 12 سنة، وعندي 3 بنات: كاميلا، ناعومي، وجميلة.. ولما اتقدمت لـ دانيا، كنت رومانسي فعلاً، زي فارس أبو العزم اللي مش ملزق".

وأشاد كريم فهمي بزوجته دانيا، مؤكدًا أن دورها في حياته لا يُقدّر بثمن: "دانيا قصة مختلفة تمامًا، لو في حاجة أنا وصلت لها دلوقتي، فالنجاح ده 90% بيرجع ليها و10% ليا.. دي إنسانة وقفت جنبي وأنا لا معايا فلوس، ولا شقة، ولا عربية، وبنقل من كارير طبيب أسنان لممثل ومؤلف".

بتختار لبسي

وأضاف: “مين يتحمل ده كله؟ سنة ورا سنة وإحنا مش معانا غير اللي بناكل بيه، ولما كانت بتتعرض عليا أعمال وأرفضها، كانت تقول لي: ”لو مش حاسس بالدور ما تعملوش، وهي بتحبني كمؤلف أكتر من كممثل".

وتابع: "دانيا بتختار لبسي، وبتقرأ كل أعمالي، هي الجندي المجهول في كل نجاح ليا".

وأضاف: "واحدة وقفت جنبي وأنا حسابي في البنك صفر، ومش بشتغل، ومش معايا حاجة، لا شقة ولا عربية، وبنقل كاريري من طبيب أسنان لمؤلف وممثل، ومين يتحمل ويأمن ليك؟ إلا لو كانت بنت ناس وبتحبك بجد، وشايفة إنك هتبقى حاجة؟ ومين ممكن يستحمل لمدة عامين كاملين وإحنا مش معانا جنيه في البنك غير اللي بناكل وبنشرب بيه، وبالعافية زاقين؟".

أكيد كنا بنغير

وعن الغيرة عليه من المعجبات، أوضح كريم: "أكيد كلنا بنغير، هي كانت بتسألني عن مشاهد معينة وهتتصور إزاي، وأنا كمان كنت بغير، بس مع النضج والخبرة الأمور اتغيرت، وكل واحد فينا نضج مع التاني".

وواصل: "فيه حاجات كتير بتختلف بداية الزواج عن الفترة اللاحقة مع النضج والحياة والخبرات. أنا شخصيًا في بداية الزواج مختلف عن دلوقتي. في أول جوازنا، لما كان بيجي حد زميلها في المدرسة وأنا معرفوش، يسلم عليها، كنت بقول قدامه: مين ده؟ وكنت بحرجها، مع الوقت، الموضوع اتغير ونفس الشيء من عندها، كانت في أول الزواج بتغير جدًا، وتسألني: إنت هتعمل المشهد ده إزاي؟ دلوقتي الأمور اختلفت".

واختتم قائلًا: "كلانا نضج، وهي نضجت مع نضوجي في الحياة الزوجية".