أزمة 3 الفجر وحبس السعيد.. أسرار هزيمة مصر من السعودية بمونديال 2018

كشف محمود فايز، مساعد المدرب الأسبق لمنتخب مصر هيكتور كوبر، تفاصيل مثيرة جرت قبل الخسارة أمام السعودية في كأس العالم 2018، والتي اعتبرها من أسباب الأداء الضعيف للفريق.

أزمات المنتخب ليلة مباراة السعودية 

وأوضح فايز، خلال ظهوره في بودكاست "جول كاست" مع الإعلامي عبدالرحمن مجدي، أنه أثناء تحضيره لفيديو التحليل الخاص بالمباراة، تلقى أخبارًا تفيد بانتقال علي جبر وطارق حامد إلى بيراميدز دون علم اللاعبين، ما تسبب في أزمة حادة داخل المعسكر وصلت إلى مشادات عنيفة بين اللاعبين ومسؤولي نادي الزمالك في الثالثة فجرًا، قبل المباراة بساعات قليلة.

أزمة علي جبر وطارق حامد 

وقال محمود فايز: "أنا كنت قاعد بفرّغ فيديو التحليل اللي المفروض نعرضه على اللعيبة تاني يوم قبل ماتش السعودية، وفجأة لقيت تليفوني بينفجر برسائل ومكالمات من مصر.. بيقولوا لي إن علي جبر وطارق حامد اتباعوا لـ بيراميدز؟".

وأضاف: "الماتش تاني يوم الصبح، قمت على طول وطلعت على أوضتهم، الساعة كانت 3 الفجر، دخلت لقيتهم في حالة خناق وزعيق، كانوا بيتخانقوا مع حد من إدارة الزمالك وبيقولوا له “إزاي تبيعونا من غير ما نعرف؟ إحنا مش هنمشي كده وخلاص”.

وتابع فايز: "بصيت عليهم وقلت لهم: يا جماعة بكرة ماتش مهم جدًا، ماتش ممكن يكتب تاريخ، لو كسبنا، تبقى أول مرة نكسب في كأس العالم، حطينا رجلينا خلاص، لازم نكمل". 

معاناة وغضب صلاح 

وواصل: "لكن الضغط كان كبير، والحظ مكانش معانا من الأول، وصلاح جه من المعسكر وهو زعلان، عنده إصابة وكان نفسه يعمل حاجة كبيرة، المشاكل كتير، والأجواء مش مستقرة من الأول".

أزمة عبدالله السعيد 

وأكمل: "والمفاجأة كانت قبل الماتش بنص ساعة! إحنا نازلين نسخن، ألاقي عبدالله السعيد بيكلم محمد طاهر من الإدارة، وبيقوله: “أنا مش هرجع مع الطيارة، أنا راجع على إنجلترا.. جايلي خبر إن فيه بلاغ في النائب العام بسبب الـ40 مليون بتوع الزمالك، ولو رجعت مصر ممكن يتقبض عليا”. 

وأتم فايز: "كل ده بيحصل قبل الماتش بنص ساعة، اللعيبة كلها سمعت الكلام، وكان طبيعي جدًا إن الفريق يتأثر بالشكل ده".