والدة طفل دمنهور: ابني شخصيته قوية جدا وأنا فخورة به

أكدت والدة ضحية واقعة دمنهور، أنها لم تتواصل مع مديرة المدرسة التي تم فصلها على خلفية الواقعة، مشيرة إلى أنها فضّلت اتخاذ الإجراءات القانونية فور علمها بما حدث.

طفل دمنهور

وقالت خلال مداخلة هاتفية مع الإعلامية بسمة وهبة: "معرفتش أتعامل معاها ولا حاولت، أول ما عرفت اللي حصل لياسين في إجازة الترم الأول، بدأت فورًا في الإجراءات القانونية".

وأوضحت: "دفعت مصاريف الترم الثاني لأن التحويل وقتها ماكنش ممكن، لكن بعد كده حولت أوراقه فعليًا، وياسين مبقاش بيروح المدرسة دي تاني".

وتابعت: "هو مش بيروح المدرسة أصلًا دلوقتي بسبب حالته النفسية والجسمانية، ولما يقدر إن شاء الله هيرجع. دلوقتي إحنا نقدر ندخله المدرسة اللي هو عاوزها، وإن شاء الله يكون في أحسن مكان".

ابني مش ضعيف

وفي مداخلة أخرى بنفس البرنامج، ردّت والدة ياسين على تصريحات محامي المتهم، الذي زعم أن الطفل غير سوي ويعاني من تشتت انتباه وفرط حركة، وضعيف دراسيًا، مؤكدة أن كل هذه المزاعم لا تمت للواقع بصلة.

وقالت: "الكلام دا غير صحيح بالمرة، وياسين ممتاز في تعليمه، وقدمنا للنيابة شهادات وامتحانات تثبت تفوقه الدراسي وحصوله على درجات عالية".

وأضافت: "ابني بيحكي كل حاجة مر بيها، وأنا بدعمه نفسيًا وطبيًا، وشخصيته قوية جدًا، والحمد لله إنه قادر يتكلم ويواجه أنا فخورة به".