الخبير "الإسباني" يكشف على بطيخ مصر.. "الحلوة أم شامة جاية من الواحات"

عم الإسباني أشهر "بطاطخي" بورسعيد يكشف أسرار البطيخ

شاما الريس

A . .A

“البطيخ من يوم الحد الجاي هيبقى ببلاش” قالها عم "الإسباني"، أحد أشهر باعة البطيخ في بورسعيد، بصوته العالي وضحكته المميزة وسط السوق الشعبي، ليخطف انتباه المارّة قبل الكاميرا.

الرجل الذي تحوّل من بائع بطيخ إلى نجم في الشارع البورسعيدي، لم يكن مجرد "بطاطخي"، بل شخصية شعبية تُدرّس، وفنان يرسم وجوه المشاهير على البطيخ، ومدرّب ميداني يعلم الزبائن كيف يختارون "الحمراء الصح".

بطيخة الشعراوي

عرض عم الإسباني واحدة من بطيخاته الفريدة، مرسوم على قشرتها وجه الشيخ محمد متولي الشعراوي، وأكد أنها “مش بس فاكهة، لكنها لوحة فنية ورسالة حب”. وقال خلال بث مباشر أجرته معه تليجراف مصر: "أنا مش بس ببيع.. أنا بعلم، وكل بطيخة عندي وراها قصة".

كشف سر "الشامة" الصفراء

أوضح الإسباني أن الشامة الصفراء – أو كما أسماها “علامة الصلاة”– هي السر في معرفة البطيخة الناضجة، وقال: “دي العلامة اللي بتبقى البطيخة ارتكزت عليها في الأرض، ودي معناها إنها شربت ميه كفاية واستوت على أصولها”.
وأضاف أن “العلامة دي بتكون لونها مصفر وصغيرة، ولو لقيتها في البطيخة، يبقى أنت ماسك في إيدك بطيخة حمراء وصحية”.

ميّز بين "القرعة" و"الحمراء"

فرّق عم الإسباني بين نوعين من البطيخ من خلال القشرة، وقال: “البطيخة الملساء اللي قشرتها ناعمة ومستوية.. غالبًا بتطلع قرعة، لكن البطيخة اللي شكلها فيه تعريجات وانحناءات، هي اللي بتبقى من جوه حمراء تفتح النفس”. وبيّن أن “الخبطة على البطيخة ممكن تساعد، لكن ما نعتمدش عليها لوحدها، الأهم شكل القشرة”.

بطيخ الواحات ومياه الآبار

مدح عم الإسباني بطيخ الواحات وقال إنه الأفضل على الإطلاق، والسبب هو المياه النقية اللي بتروي الأراضي هناك، وأضاف: "بطيخ الواحات بيتغذى على ميه من الآبار، ميه طالعة من جوف الأرض، وده بيأثر في الطعم جدًا.. البطيخة هناك بتبقى طرية وحلوة وريحة ميّتها نفسها حلوة".
وأكد أن البطيخ اللي طعمه "زفر" – على حد وصفه – يبقى غالبًا مزروع بميه مش صحية أو في أرض ملوثة.

ربط جودة البطيخ بضمير الزرّاع

أكد عم الإسباني إن الضمير هو العامل الأساسي اللي بيحدد جودة البطيخ، وقال:
"في لب بيتزرع بيه البطيخ الكيلو منه بـ70 جنيه، وفي نوع نضيف الكيلو منه بـ28 ألف جنيه! الفرق مش بس في السعر، الفرق في الطعم والنظافة والنية اللي اتزرعت بيها البذرة."

انخفاض الأسعار مع موسم الجني

طمأن عم الإسباني الناس بأن “البطيخ هيبقى متوفر ورخيص بداية من يوم الأحد”، وقال: “الفترة اللي فاتت كان فيها نوات، والمزارعين ما لموش البطيخ من الأرض.. علشان كده كان قليل وسعره غالي. إنما من الحد الجاي، هيبدأ الجني، والسوق هيمتلي، والأسعار هتنزل وهتاكلوا بطيخ على مزاجكم.”