"أنا مش بشر".. تراجيديا وأقوال مأثورة في أعمال عادل إمام

تنوع المشوار الفني للزعيم عادل إمام، بين السينما والمسرح والدراما التليفزيونية، بقائمة مميزة من الأعمال التي يشاهدها الجمهور حتى الآن. 

ورغم تصنيف الزعيم ككوميديان، إلا أنه أبدع في العديد من الأعمال بعيدًا عن الكوميديا، أبرزها "حتى لا يطير الدخان"، و"الحريف"، و"عمارة يعقوبيان"، و"طيور الظلام". 

ومع كل عمل من تلك القائمة المطولة، خرجت عبارات وأقوال مأثورة مهمة من الزعيم، نستعرضها بالتزامن مع عيد ميلاده الـ 85. 

1-أنا مش بشر أنا قدر

أنا الزعيم، أنا اللي هزيت التاريخ جامد، وطلقت بركانه اللي كان خامد، أنا مفجر الثورة البيضا والحمرا، والصفرا والخضرا، أنا الزعيم المستديم، أنا الزعيم المستديم، أنا مش بشر أنا قدر (مسرحية الزعيم 1993 - فاروق صبري).

2-اللي يشوف البلد دي من فوق

اللي يشوف البلد دي من فوق، غير اللي يشوفها من تحت (طيور الظلام 1995 وحيد حامد).

3-اللي فوق مش مضمونين

اللي فوق مش مضمونين يا حسن، البلد دي علشان تعيش فيها لازم تظبط من فوق ومن تحت، علشان لو اللي فوق سابوك اللي تحت يلقفوك، ولو اللي تحت سابوك اللي فوق يحموك (مرجان أحمد مرجان 2007 - يوسف معاطي).

4-يبصوا علينا ليه؟

البلد دي كانت أحسن من باريس، كانت الموضة تنزل هنا قبل ما تنزل باريس، الشوارع كانت نضيفة زي الفل، المحلات كانت فخمة، الناس كانوا مؤدبين، يبصوا علينا ليه، يبصوا على البلد اللي باظت، يبصوا على العمارات اللي كانت أحسن من عمارات أوروبا، دلوقتي بقت مزابل من فوق، ومن تحت مسخ، إحنا في زمن المسخ (عمارة يعقوبيان 2006 - وحيد حامد). 

5-صاحبي وصاحبك 

صاحبي وصاحبك على القهوة، صاحبي دراعي وعمي قرشي (سلام يا صاحبي 1986 - صلاح فؤاد).

6- معنديش أقراص للحزن

تاخدي قرص منوم؟ معايا أقراص تصحي لو عايزة، ومعايا كمان أقراص للضحك، بس معنديش أقراص للحزن، علشان ده موجود طبيعي (الإنسان يعيش مرة واحدة 1981 - وحيد حامد).

7- المتعة في الرحلة

أمك مش عايزاك تبقى زيي، عايزاك أحسن مني، علشان كده بقولك ذاكر، أنا ضيعت عمري ورا الكورة ومخدتش منها حاجة، أنا لا نجحت في الدراسة ولا اتوفقت في الكورة، بس تعرف أنا لو عاد بيا الزمن هعمل نفس اللي عملته وهلعب كورة من جديد، المتعة في الرحلة مش في الوصول (الحريف 1983 - بشير الديك).

8-من برة متزوقة

الهدوم مبتغيرش صاحبها، إنتي مبتبصيش غير على المظاهر، إنتي متعرفيش حاجة أبدا، إنتي واحدة من برة متزوقة ومن جوه فاضية (حتى لا يطير الدخان 1984 - إحسان عبد القدوس).

9-كل حاجة راحت

عارف لما تكون عايش في أمان الله، عايش وعندك بيت وأم وأخ وحبيبة، عندك فلوكة وفلوس، وبترزق وماشية وآخر ألسطة، والدنيا حلوة في عينك، وهوب كل ده يطربق فوق دماغك، كل حاجة راحت (أحلام الفتى الطاير 1978 - وحيد حامد).

10- أنا المخدوع بالكلام

أنا حسن البهنسي بهلول، أنا المسكين في هذا الزمان، أنا المُحاط بالأوهام، أنا الذي إذا جاع نام، أنا المخدوع بالكلام، أنا اتسرقت يا علي، اتسرقت (اللعب مع الكبار 1991 - وحيد حامد).

11- أنا مليش مطالب

أنا مليش مطالب، أنا أصلي كنت جاي علشان اختم ورق ولادي، كنت عايز أنقلهم من مدرسة بعيد عن البيت لمدرسة جنب البيت، لكن مدام المسائل وصلت لقطع الرقبة فإحنا كمان لازم مطالبنا توصل لمستوى قطع الرقبة، أنا طول عمري بسمع كلام الحكومة، الحكومة دي واللي قبليها واللي قبليها، والحكومة اللي جاية كمان هسمع كلامها، أصلي افرض مسمعتش كلام الحكومة هيحصل إيه (الإرهاب والكباب 1992 - وحيد حامد).