شهر بالملح.. ننشر نص أقوال الجيران بواقعة تحنيط سيدة جسد زوجها المتوفى

كشفت تحقيقات جهات التحقيق بحلوان تفاصيل صادمة في واقعة احتفاظ سيدة تحمل جنسية عربية بجسد زوجها الطبيب المتوفى داخل شقة بمنطقة 15 مايو لمدة شهر كامل، بعد وفاته، حيث استخدمت الملح لتأخير تحلل جسده، خوفًا من الملاحقة القانونية بسبب إقامتها غير الشرعية.

"تليجراف مصر" تنشر نص أقوال الجيران وأصحاب العقار في شكل سؤال وجواب كما ورد في التحقيقات الرسمية:

 أقوال الجار الأول:

س: متى لاحظت شيئًا مريبًا في الشقة؟

ج: من حوالي أسبوعين، بدأت أشم ريحة جاز قوية جاية من شقة الدكتور.

س: ماذا فعلت عندها؟

ج: خبطت على الباب، فتحتلي هي حتة صغيرة جدًا من الباب، وقالتلي إنها رشت جاز علشان في نمل.

س: هل كانت لهجتها مصرية؟

ج: لا، لهجتها عربية بس غريبة، تحسها مش مصرية .

س: هل سمعت أصواتا أو لاحظت تصرفات غريبة؟

ج: لا، بس الشقة كانت هادية جدًا، ومفيش أي صوت منها من وقت طويل.

س: ومتى كانت آخر مرة رأيت فيها المتوفى؟

ج: من أكتر من شهر، شوفته على السلم، وكان تعبان وقالنا إنه وقع في الشارع.

 أقوال الجارة:

س: هل شممتِ رائحة غريبة؟

ج: آه، كانت بتيجي من أوضة ماما والحمام، زي ريحة جيفة فار، وقعدت حوالي أسبوعين.

س: هل رأيتِ المتوفى مؤخرًا؟

ج: لا، مختفٍ بقاله كتير، وكنت شاكة إنه ممكن يكون مات.

س: هل لاحظتِ أي تصرفات مريبة من السيدة؟

ج: هي كانت غامضة، ومكنتش برتاحلها، وفي مرة سمعت صوت رجلين بتجري جوه الشقة.

س: ومتى علمتِ بوفاته؟

ج: النهارده، لما حضرتك (وكيل النيابة) كنت بتكلمني عند الشقة.

أقوال مالك العقار:

س: لماذا ذهبت إلى الشقة؟

ج: لأنهم تأخروا في دفع الإيجار، ودي مش عادتهم، فخبطت على الباب.

س: ماذا قالت لك السيدة؟

ج: قالتلي إن الدكتور تعبان في المستشفى بقاله 15 يوما، وإن موبايله بايظ.

س: ومتى علمت بوفاته؟

ج: تاني يوم، بعتتلي رسالة على تليفوني قالتلي فيها إنه مات وإنه في الشقة، وسبتلي المفتاح في عداد الكهرباء.

س: ماذا فعلت بعد الرسالة؟

ج: رحت لابنه اللي ساكن في الشروق، وخدته وفتحنا الشقة، لقينا جثته متغطية بملاءة ومرشوش عليها ملح كتير.

أقوال سيدة أخرى من الجيران:

س: هل لاحظتِ تصرفات غير طبيعية؟

ج: من حوالي 10 أيام، كانت المياه قاطعة، وشوفتها بتنزل تملي مياه من عربية، وبتستخدم إزايز كلور علشان تشرب منها.

س: ومتى كانت آخر مرة شُوهدت فيها؟

ج: من أسبوعين، في يوم المياه، لما نزلت تملي زي باقي السكان.

القضية ما زالت قيد التحقيق، وتم التحفظ على السيدة المتهمة، وتخضع حاليًا لاستجواب موسع أمام النيابة العامة، بينما تم تشريح الجثة لبيان سبب الوفاة النهائي.