بسمة وهبة عقب تقديم بلاغ ضد خالد يوسف: اتعرضت لظلم واضح (صور)

كشفت الإعلامية بسمة وهبة، تقديم بلاغا رسميا إلى الجهات الأمنية ضد المخرج خالد يوسف، تتهمه خلاله بالتشهير بها عبر منصات التواصل الاجتماعي، ونشر مكالمة مفبركة تتضمن تهديدات مباشرة وتحريضًا ضدها من قبل زوجته.

بلاغ بسمة وهبة ضد خالد يوسف

وقالت بسمة وهبة لـ"تليجراف مصر": "أنا مش عايزة أتكلم في تفاصيل دلوقتي، لأن ده دور المحامين، وهم الأقدر على الحديث من الناحية القانونية، خاصة وإن الموضوع دخل بالفعل في إطار قانوني، لكن اللي متأكدة منه تمامًا إن حقي هاخده بالقانون، وعندي يقين إن مصر بلد القانون، وإن حقي مش هيروح".

وأضافت: "أنا مذيعة، وكان ممكن أطلع أتكلم وأحكي كل اللي حصل، لكن فضّلت أتصرف كمواطنة مصرية عادية، وتقدمت بالخطوات القانونية اللازمة، وده كل اللي أنا عايزاه، وفي المكالمة اللي حصلت أنا اتظلمت ظلم واضح، لكن ما اتكلمتش، واخترت الطريق القانوني، وواثقة إنه هيكون فيه إنصاف وعدل".

المخرج عمر زهران

وأكملت: “لما فيديو بينزل على السوشيال ميديا بعنوان اتفرج على بسمة وهبة وهي بتتهان زي الكتكوت المبلول، لازم نسأل: مين اللي نزله؟ المكالمة اللي ظهرت مش كاملة، وكانت بيني وبين الطرف الآخر، ومعظمها لم يُعرض، بل تم اجتزاؤها وإضافة مقاطع لم تصدر عني، ولم تُقال أصلًا، فمين المسؤول؟ أنا؟ ولا الطرف التاني، هل طبيعي إن كل شخص يشهد مع المخرج عمر زهران يتعرض لقضية؟ زي ما حصل معايا ومع الفنانة هالة صدقي؟".

مكالمة بسمة وهبة وشاليمار شربتللى

وتابعت حديثها: "المكالمة اللي حصلت كنت فيها بحاول أهدّي الأمور، وقلت للطرف التاني إني مستعدة أعوّضها عن الشيء اللي ادعت إنه اتسرق، لكن اللي حصل كان سخرية وتحريف وقص ولزق، وكلام نُسب لي ولم يحدث، حتى صوتي في المكالمة تم تخفيضه عمدًا".

واختتمت بسمة وهبة، تصريحاتها بالتأكيد على احترامها الكامل للقانون، قائلة: "أنا مش طالبة غير العدالة، وكل اللي بطلبه إن الفلاشة اللي اتقدمت للنيابة يتم فحصها فنيًا، وواثقة في نزاهة النيابة المصرية وفي قضاء بلدنا العادل".