محمد رمضان: أتعرض لاضطهاد من 11 سنة.. وقالوا لابني “يا أسود”

أعرب الفنان محمد رمضان، عن استيائه الشديد، بسبب أزمة نجله الأخيرة في أحد النوادي، بعد ما واصفه بانتهاك خصوصيته ونشر صورته.

وكتب محمد رمضان، عبر حسابه الرسمي بمنصة “إنستجرام”: “القانون من 2018 يؤكد ضرورة حماية الطفل والعيلة بحجب هوية الطفل واسمه وصورته عن الإعلام والصحافة حتى لو كان مُجرد شاهد في قضية، ولكن لأن الطفل ده أبوه محمد رمضان يبقى حلال”.

وتابع: "وبالأمر يصدروا بيانا صحفيا لكل الصحف والمواقع العامة والخاصة والحكومية انشر صورة ابن محمد رمضان واكتب إنه هيتاخد من أمه وأبوه وهيروح دار الرعاية، مع إن القانون بيمنع النشر ولكنهم نشروا، من حقي كأب أعرف مين خالف القانون وأصدر البيان الصحفي اللي مفيش مؤسسة واحدة قدرت ترفض نشره، ورغم كل شيء لا أشك أبدًا في نزاهة القضاء المصري".

فلوسك حرام

واستكمل: "ابني اللي كان واضح في الڤيديو اللي النيابة شافته إنه كان قاعد في حاله مع أخته الصغيرة في النادي وراحوله مجموعة أطفال يقولوله إنت أسود زي أبوك، وأبوك عنده ڤيلا كبيرة، وعربيات علشان فلوسه حرام إنما إحنا عايشين في شقق نيو جيزة، علشان أهالينا مش حرامية، ولما ابني كلمني في التليفون سمعت الكلام ده بنفسي".

طفل في المعركة 

وأضاف: "واضح أن ده كلام أهل طفل منهم لأن مستحيل طفل يفكر كده، وده في حد ذاته بيزرع الحقد والغل الطبقي بين الأطفال، ورحت لابني النادي واتكلمت مع الأطفال قدام فرد الأمن ومدرب السباحة إنكم إخوات وجيران وده واضح في فيديوهات النادي اللي شافتها النيابة، عمومًا دي حلقة من سلسلة طويلة من الاضطهاد الواضح والقسوة والتعنت تجاهي لأكثر من 11 سنة وبكتب النهارده بس علشان ماتخيلتش إنهم يدخّلوا طفل عنده 11 سنة في معركتهم مع أبوه".

هنفضل نحب بلدنا

واختتم رمضان: "ماتوقعتش قسوة الحكم والتشهير بيا وبعيلتي للدرجة دي، وللعلم الشارع المصري فاهم اللي بيحصل وشايفه بوضوح الشمس، ولكن مهما حاولوا ومهما ظلموا سواء بالقصد أو بالجهل هنفضل أنا وأولادي وعيلتي نحب بلدنا وهنعيش ونموت فيها، ولا عاش ولا كان اللي يكرهني في مصر، نحيا كمصريين أولًا بحبنا لبعض بدون غيرة أو حقد أو استكتار علشان تحيا مصر".

أزمة نجل محمد رمضان

ومؤخرًا، حددت محكمة مستأنف الطفل جلسة 19 يونيو المقبل، لبدء نظر الطعن المقدم من الفنان محمد رمضان على قرار إيداع نجله في دار رعاية، وذلك بعد اتهامه بالتعدي على طفل داخل نادٍ رياضي شهير في كمبوند نيو جيزة بمدينة 6 أكتوبر.

وكانت محكمة جنح الطفل بمدينة 6 أكتوبر قد أصدرت في وقت سابق قرارًا بإيداع نجل الفنان محمد رمضان في إحدى دور الرعاية الاجتماعية، على خلفية واقعة اعتداء على أحد زملائه داخل النادي، وذلك بحسب تصريحات أحمد مختار، محامي الطفل المجني عليه.