زينة عن واقعة الكلب: نائب برلماني قال لي "إحنا اللي بنعمل القوانين"

كشفت الفنانة زينة تفاصيل تعرض أبنائها للاعتداء بواسطة كلب داخل ملعب كرة قدم بأحد الكمبوندات، مشيرة إلى أنها فوجئت بتدخل "نائب" حاول منعها من اتخاذ الإجراءات القانونية، مؤكدة إصرارها على الحصول على حقها عبر القانون.

بداية الواقعة

قالت "زينة" في تصريحات تلفزيونية، إنه أثناء تواجد أبنائها داخل ملعب كرة قدم، "جاء إليهم طفل يبلغ من العمر 11 عامًا، وطلب منهم الخروج من الملعب من أجل لعب الكرة مع أقاربه".

وتابعت: "اللي حصل فيه ولد قال لابني أنه عايز يلعب، قالوا له ده الحجز بتاعنا تعالى العب معانا احنا الاتنين، قاله لأ أنا معايا قرايبي وعايز العب معاهم، ابني قاله احنا حاجزين ومش هسيبلك الحجز بتاعي، الولد قال طب أنا هعرف أخرجك إزاي".

وأضافت: "الولد وصل الملعب وأطلق الكلب عليهم وجري وراء عيالي في الملعب، واحد خاف ونط من سور حديد مسمار جابله دراعه الشمال، والتاني الكلب هجم عليه وخربشه في رجله وبعدين طلع يجري وراء التاني".

وأكملت: "لقيت تليفون من ابني بيقولي الحقيني يا مامي في واحد سايب علينا كلب في الملعب وعايز يعضني وأنا اتعورت".

مواجهة مع والدة الطفل

وتابعت: "أنا جيت جري لقيت ولادي قاعدين في مكتب أمن الكمبوند مستخبيين مقفول عليهم عشان خايفين من الكلب، قولتلهم مين اللي شاف الواقعة قالولي مشرف الأمن، ومشي من عند الملعب، روحت جريت أشوف فين مشرف الأمن، مين دول وايه اللي حصل، لأن ده في العادي ده مابيحصلش، جريت وراء المشرف لقيت واقف، قولتله ايه اللي حصل، قالي الولد اللي معاه الكلب أهو".

وأكملت: "قولتله أنت ابن مين يا حبيبي وساكن فين قالي البيت اهو، قولتله أنا مش هكلمك، الكلام مع أهلك، أنا هتفاهم معاهم، الولد دخل البيت ولقيت واحدة طلعت بتشتمني وتجاوزت، وقلتلها أنا غلطانة أنا جاية أقولك إنك متخرجيش الكلب مع ابنك، وجوزها عمال يسكت فيها دي مش بتسكت صوت عالي وألفاظ ماسبتش حاجة مقالتهاش، وهي عارفة إني زينة".

تدخل "نائب" ومحاولة للصلح

وتابعت زينة أنه عندما وصلت إلى القسم لعمل محضر، "لقيت 3 أشخاص محترمين بيعرفوني بنفسهم وواحد منهم قالي أنا النائب محمد الجارحي، فقلت لهم ليه كلمة 'نائب' في التعريف بالشخصية أنا زينة من غير فنانة، وطلبوا مني التصالح وأنا كنت مصرة لو هتصالح إن الولد يعتذر لابني".

وأشارت إلى أن "أحدهم قالي مش هنجيب أولادنا في القسم، وقولتلهم ما أنا ابني جاي معايا القسم".

وواصلت: "لما اتكلمت مع أحدهم وهو نائب أيضًا من عائلة الجارحي وأقارب لوالدة الطفل وأخبرته بأن سيادة الرئيس مطلع قانون علشان الكلاب والأطفال، قالي إحنا اللي بنطلع القوانين، قولتله يعني بتعملوا القوانين دي علشان يطبق علينا كعامة الناس".

محضر رسمي

وتابعت: "خرجت من القسم مع ابني وطلبت من الولد يعتذر لأولادي والولد اعتذر وقال أنا آسف، لكن أمه رفضت الاعتذار، ووجهت لي نفس الألفاظ السابقة "لا قلم زاد ولا نقص".

وأكدت زينة أنها "اتصلت بالنجدة لإثبات الحالة وقولتلها أنا هعرف آخد حقي بالقانون، ومش هستنى تحصل حاجة وحشة في ولادي وإحنا في دولة قانون".

قالت زينة: "أنا عملت كشف طبي على ولادي، وعملت محضر في أسرة الولد بتوجيه السباب والشتائم وإطلاق كلب على أولادي داخل ملعب كرة قدم".

وأتمت: "إزاي كلب متوحش زي ده يمشي مع طفل عنده 11 سنة والكلب قده مرتين، ويدخل بيه ملعب كرة قدم وكلب مش مترخص وبيهجم على أولادي، المفروض أستنى يحصل مصيبة يعني؟ أنا عايزة حق ابني ومش هسيب حقي ومتعودة آخد حقي بالقانون".