أقوال فرد أمن تكشف تفاصيل جديدة حول أزمة شيف شهير بـ"الفيلا 515"

لا تزال أزمة "فيلا 515"، مصدر خلاف بين شيف شهير، وطليقته بسبب قيام الأخيرة بتأجيرها له ولشخص آخر، مما أثار نزاعا حادًا بين الطرفين.

وحصلت “تليجراف مصر ”على نص أقوال فرد الأمن الذي كان موجودا أمام الفيلا محل النزاع، وروى تفاصيل الواقعة كاملة.

أقوال فرد الأمن في أزمة فيلا 515

س: ما تفصيلات شهادتك؟

ج: اللي حصل إني كنت قاعد في الكشك بتاع الأمن بتاعي أول إمبارح بعد العشاء تقريباً لقيت عربيتين أو ثلاثة ركنوا عند فيلا رقم 515 في الكمبوند ونزل منها من خمسة لسبعة تقريبًا وقعدوا يخبطوا على البوابة الحديد اللي برة بتاعة الفيلا، وساعتها في واحد منهم جالي وقالي إنت مين وبتعمل إيه هنا قولتله أنا فرد أمن هنا قالي طب اقعد شوف شغلك ومالكش دعوة بينا، وبعدين في حد فتح من جوه الفيلا اللي هو سعد علي الغفير بتاع أستاذ محمد حربي اللي قاعد في الفيلا اللي مأجرها، ولما سعد فتحلهم راحوا داخلين على طول جوه وأنا برة سمعت زعيق والنور لقيته اطفى فجأة وانا ساعتها قلقت وبلغت المشرف اللي كان موجود وبلغت زميلي على بوابة 4 عشان دي بوابة الزائرين بس.

وبعديها بحوالي ربع ساعة أو نص ساعة لقيت زمايلي بيكلموني وقالولي أستاذ محمد حربي جاي في الطريق، وأستاذ محمد حربي جه فعلاً بعديها بحوالي نص ساعة تقريباً أو ساعة إلا ربع وفضل واقف بره معرفش يخش، وسعد جوه كان صوته عالي وبيتخانق مع الناس وهو قاله ساعتها استنى يا سعد وماتتخناقش مع حد وأنا هكلم النجدة وقعد يكلم النجدة كتير فعلاً بس تقريباً محدش رد عليه، وبعدين ساعتها كان هو لمح حد خارج من الفيلا وشايل حاجات فطلب من زميل ليا إن هما يروحوا يدوروا عليه وزميلي راح معاه فعلاً بس مالقوش حد فرجعوا تاني.

ولما أستاذ محمد حربي رجع تاني فضل يتصل بالنجدة بس ماكنش في حد بيرد خالص وساعتها الشيف ظهر وشوفته اتكلم مع محمد حربي شوية وشدوا مع بعض ورجالة الشيف زقوا أستاذ محمد حربي على عربيته وساعتها سعد اتخانق مع الشيف الشهير، وبعدين هو طلب من اللي جوه يطلعوله سعد برة وهما فعلا طلعوا سعد برة وهو خدوا معاه في العربية وكان بيقول إنه رايح القسم يعمل محضر وبس ومن ساعتها ماشوفتوش وهو ده اللي انا شوفته.

س: متى وأين حدث ذلك؟

ج: الكلام ده حصل كان يوم التلات بعد العشا تقريباً عند فيلا 515 في كمبوند زايد 2000.

س: وما سبب ومناسبة تواجدك بالزمان والمكان سالفي البيان؟

ج: عشان أنا كنت واقف خدمة أمن هناك ساعتها.

س: ومن كان برفقتك آنذاك؟

ج: أنا كنت لوحدي.

س: ومنذ متى وأنت تعمل بالمجمع السكني محل الواقعة؟

ج: أنا شغال هناك بقالي 5 أو 6 شهور تقريبًا.

س: وما هو نطاق تواجدك في محيط المجمع السكني محل حدوث الواقعة؟

ج: أنا أساسًا ببقى واقف على البوابات بس في رمضان، ومؤخرًا عامة بقيت أدخل جوه فرد أمن في الكمبوند من جوه عشان مبدل مع واحد زميلي بس.

س: وهل تتغير دائرة خدمتك بداخل المجمع السكني بشكل دوري أم ثابتة في نطاق محدد؟

ج: دي على حسب توزيعة المشرف ممكن مكان خدمتي يتغير كل يوم وممكن أقعد أسبوع في نفس المكان.

س: وهل سبق لك أداء خدمتك أمام العين محل الواقعة من قبل؟

ج: آه وقفت هناك خدمة كذا مرة قبل كده.

س: وهل لديك ثمة معلومات عن الحائز الفعلي والمقيم فعليًا بالعين محل الواقعة؟

ج: أستاذ محمد حربي، بقاله حوالي شهرين قاعد فيها مأجرها ومعاه الغفير بتاعه سعد.