جوري بكر: تعرضت لانهيار عصبي بسبب المشاركة في 3 مسلسلات برمضان

عبّرت الفنانة جوري بكر عن سعادتها بنجاحها في دراما رمضان 2025، من خلال مشاركتها في ثلاثة أعمال دفعة واحدة، وهي: شباب امرأة، المداح: أسطورة العودة، وسيد الناس.

وقالت جوري في تصريحات خاصة لـ"تليجراف مصر": "جالي انهيار عصبي من الضغط، كنت بصور في 3 مسلسلات في نفس الوقت، ومكنتش بنام، لأن ده كان تحدي كبير بالنسبة لي. كنت عايزة أثبت نفسي في أكتر من نوع وشخصية، ومش عايزة أكون محصورة في دور واحد. والحمد لله، ربنا كرمني بنجاح الأعمال التلاتة".

عن كواليس تصوير "المداح": ما فيش حاجة تخوف

وعلقت جوري على ما تردد عن تعرّض طاقم عمل مسلسل المداح: أسطورة العودة لأحداث غريبة أثناء التصوير، قائلة: "مافيش الكلام ده، إحنا كنا بنشتغل وبنصوّر، ومفيش حاجة تخوف، بس أنا شخصيًا مبحبش أتعمق في التفاصيل اللي زي دي. يعني ممكن ألاقي حاجة كنت حطاها في مكان ألاقيها في مكان تاني، أو سلسلة بتتشال أو تتكسر فجأة أثناء التصوير، بس كله كان لعب خفيف".

وأضافت: "كنا دايمًا بنقرأ قرآن ونصلي قبل التصوير، وده كان بيدينا طاقة إيجابية. ويا رب أشارك في الجزء السادس لو اتعمل".

أبدت جوري بكر رغبتها في عودة الفنان محمد رمضان إلى الساحة الفنية بقوة، قائلة: "محمد رمضان من أفضل الناس اللي اتعاملت معاهم، وأتمنى يرجع تاني بقوة لأنه فنان مميز وله مكانة كبيرة عند الجمهور".

محمد سامي.. مكتشف جوري بكر

وتحدثت جوري عن المخرج محمد سامي، معبرة عن حزنها لقراره بالاعتزال، وقالت: "محمد سامي صديق عزيز جدًا، وهو اللي اكتشفني فنيًا، واشتغلت معاه أول مرة في مسلسل البرنس. بحس براحة لما بشتغل معاه، وزعلت جدًا من قرار اعتزاله، لأنه مخرج موهوب ومهم في الساحة الفنية".