أحمد مرتضي منصور: مجلس الزمالك خاف يبيع زيزو بسبب "السوشيال ميديا"

يرى أحمد مرتضى منصور عضو مجلس إدارة نادي الزمالك السابق أن سبب عدم قيام الزمالك بالموافقة على بيع زيزو لاعب الأهلي الحالي والزمالك السابق هو الخوف من "السوشيال ميديا".

وقال مرتضي، خلال تواجده ضيفا مع عمر ربيع ياسين ببرنامجه "مان تو مان": "لما وصل الزمالك مع زيزو لمرحلة أن النادي وافق على بيعه وهو رفض الرحيل، تواصلت مع مجلس الزمالك من خلال بعض الأشخاص وقولتلهم بيعوه هو كدا واخد سكة الأهلي".

وأضاف "توقعت أنه يروح الأهلي أو بيراميدز اللي يدفع أكتر ودا مش عيب يا جماعة"

وتابع "اللي يقول زيزو طماع هقوله كل لاعيبة مصر طماعة بقى".

وأتم "زيزو بيدور على مصلحته ودا حقه وعايز يجمع أكبر قدر من المكاسب المادية في فترة لعبه ودا مش طمع دا حق مشروع".

أحمد مرتضى: قولت لـ هاني شكري أمسك لسانك.. ولازم يعتذر لجمهور الأهلي

وطالب أحمد مرتضى، هاني شكري عضو مجلس إدارة الزمالك الحالي بالاعتذار لجماهير الأهلي بعد واقعة الفيديو المسرب له ويتضمن إساءة لجماهير القلعة الحمراء.

وأضاف "قولت لـ هاني شكري لازم تعتذر لجمهور الأهلي.. قعدة الصحاب حاجة وكون أن أمامك كاميرا وأنت مسئول دي حاجة تانية".

وأردف "مش لازم نقطع هاني شكري، هو يطلع يعتذر وبشياكة والموضوع ينتهي ..أنا من أنصار نستر على الناس خاصة أن كل شوية تلاقي كاميرا وراك في أي حتة بتسجلك "

واختتم "لما تكون مسئول في نادي الزمالك الأمور بتختلف، كل تصرفاتك لازم تكون محسوبة، عشان أنت بتمثل نادي كبير هو الزمالك، وأنا كنت بعمل كدا وبهتم بنفسي وشكلي مع أي ظهور".