أديب عن حادث الإقليمي: ليس لدي خصومة مع وزير النقل لكن المقصر يُحاسب

وجه الإعلامي عمرو أديب، خلال حلقات برنامجه "الحكاية"، رسائل حاسمة وحزينة، عبر من خلالها عن الغضب الشعبي المتصاعد عقب الحادث الأليم الذي وقع على الطريق الإقليمي بمحافظة المنوفية، والذي أسفر عن رحيل عدد من الفتيات الشابات في مشهد مأساوي أثار موجة من الحزن والاستياء في الشارع المصري.

الحادث جرس إنذار لا يجب تجاهله

وقال أديب، إن الحادث يجب أن يكون ناقوس خطر يدق في أذن الجميع، مؤكدًا أن ما حدث لا يمكن اعتباره مجرد واقعة عابرة، بل مأساة وطنية تستوجب محاسبة ومراجعة شاملة لكافة الأوجه المرتبطة بالسلامة على الطرق.

وأضاف: "الشعب المصري كله قال بصوت واحد: الكلام ده ماينفعش.. الحادث ده ماكانش لازم يحصل، والبنات اللي ماتوا لازم يكونوا سبب في حماية بنات كتير غيرهم.. مش ممكن كل مرة نستنى تحصل مصيبة عشان نتحرك".

قبل الكارثة

وانتقد أديب، غياب التحركات الاستباقية من الجهات المعنية، قائلًا: "ليه دايمًا التحرك بييجي بعد ما الكارثة تحصل؟ ليه ما اشتغلناش من قبل؟ بكينا كتير، ونادينا بإصلاح الطرق، وتعزيز الرقابة، وشفنا مآسٍ مشابهة، لكن فين كان التنفيذ؟".

وأوضح أن هناك شعورًا عامًا بالإحباط من غياب إجراءات حقيقية لحماية أرواح المصريين على الطرق، مؤكدًا أن الأزمة تتكرر بلا حساب.

وبنبرة غاضبة، أبدى أديب، دهشته مما وصفه الصمت الرسمي حيال الحادث، قائلًا: "لحد دلوقتي، ما سمعناش عن تحقيق واحد اتفتح، ولا مسؤول تم استدعاؤه أو تمت مساءلته، ولا أي جهة حكومية طلعت بيّنت للناس إيه اللي حصل، وكأن الأرواح اللي راحت مش مهمة ومش بتفرق مع حد".

وتابع: "أنا ما عنديش خصومة مع وزير النقل، ولا أي مسؤول، وبالعكس الوزير دايمًا بيتكلم عن إنجازاته وبيقدم تقارير للمشروعات.. لكن يا جماعة حصلت مصيبة.. ومش هتنفع تتلم ببيانات وابتسامات".

ووجّه أديب، انتقادات حادة إلى البرلمان، متسائلًا: "فين مجلس النواب؟ فين المحاسبة؟ ليه مفيش حد اتكلم؟ ولا حتى نائب قدم طلب إحاطة؟ إحنا بنتكلم عن كارثة راح فيها أرواح بريئة.. ولو وزير النقل شايف إن الطريق مش تبعه، يطلع يقول تبع مين؟ لازم نعرف المسؤول الحقيقي، ونتأكد إن اللي قصر يتحاسب".

38 مليون جنيه 

وفي لفتة إنسانية ألقى أديب، الضوء على مبادرة رجل أعمال مصري تبرع بمبلغ 38 مليون جنيه لصالح أسر ضحايا الحادث، واصفًا الموقف بأنه نموذج يحتذى به في التضامن والمسؤولية المجتمعية.

وقال أديب: "الراجل ده مش جاي من بره.. ده مننا وفينا.. من بلدنا، وبيكسب من خيرها، وقرر يرد الجميل بشكل مشرف.. التبرع مش بس فلوس، دي رسالة إنك لما تكون في بلد فيها أمن وأمان، تقدر تشتغل وتكسب وتبقى مطالب ترد المعروف".

وأكد أن مثل هذه المبادرات تؤكد أن مصر لا تزال عامرة بأبنائها المخلصين، قائلًا: "مصر مليانة خير، ومليانة ناس بتحبها بجد، بس لازم نحافظ على البلد ونحاسب اللي يقصّر.. لأن مفيش استثمار من غير أمان، ومفيش بلد قوية من غير عدالة ومحاسبة".

صوت الناس لازم يتسمع

واختتم أديب حديثه برسالة واضحة إلى كل من هو في موقع مسؤولية، قائلًا: "الناس عندها إحساس، الناس حزينة، واللي حصل مش بسيط.. ومش هيتنسى.. الحكاية مش هتخلص بكلمتين، ولا ببيان.. لازم يكون في تصرف حقيقي.. وإحنا كلنا مستنيين ده يحصل".