فارس حميدة يهاجم حمو بيكا بسبب أحمد عامر: "بياخد اللقطة"

أعرب المطرب المعتزل فارس حميدة عن غضبه الشديد بسبب عدم التزام مؤدي المهرجانات حمو بيكا بحديثه عن سبب حذف أغاني الراحل أحمد عامر، وتراجعه عن موقفه من الأغاني.

وكتب فارس عبر حسابه الرسمي بمنصة “فيسبوك”: “سمعت فيديو حمو بيكا وهو بيقول: أنا ممسحتش المهرجانات اللي عندي أنا والمرحوم أحمد عامر علشان حرام، أنا مسحتها علشان خلاص دا راجل اتوفى وملهاش لازمة، وبيقول أنا ماعتزلتش ومش هعتزل إحنا مش بنعمل حاجة غلط ولا بنعمل حاجة حرام، يعني مامسحتهاش علشان حرام”.

بتاخد اللقطة

واستكمل: "يعني كنت بتاخد اللقطة يعني ولا إيه؟، يا جماعة أنا عاوز أقولكم إن أصلا المهرجان ولا الاتنين اللي كانوا عند حمو بيكا حاجات مش جايبة مشاهدات يعني ولا عاملة ترندات، يعني يا عم بيكا لو كانت مهرجانات من اللي جايبة ملايين المشاهدات عندك كنت هتمسحها بردو".

علي قدورة

واستنكر فارس من عدم حذف أغاني علي قدورة، حيث قال: "طب ما تمسح المهرجانات اللي فيها على قدورة ما الراجل تاب وتبرأ منها، وأظن ملهاش لازمة وجوده في المهرجانات برضو، ثم إن هو إيه اللي مش حرام  ده لو أنت هتتكلم مثلًا زي اللي بيتكلموا في خلاف تحريم الموسيقى علشان يردو هواهم، فا أنتم كل اللي بتقولوه حرام تحريضاتكم وإيحاءتكم وكل حاجة بتعملوها حرام في حرام". 

تكمل في المعصية

واختتم: "مش المصيبة إنك ترتكب ذنب أو تعصي الله، المصيبة إنك تستحل ده وإنك ترضي هواك إن ده مش غلط، فتكمل في المعصية وأنت مطمن، بل تطلع تضل الناس كمان أنت اعمل اللي أنت عايزه، لكن ما تضلش الناس؛ لأن اللي عندك ومتابعينك أكترهم ممكن يصدق كلامك، ويصدق إن فعلًا أنتم مبتعملوش حاجة غلط".

حذف الأغاني

وأعلن مطرب المهرجانات حمو بيكا في الأيام الماضية عبر مواقع التواصل الاجتماعي، حذف جميع أغاني المطرب الشعبي الراحل أحمد عامر، من قناته على يوتيوب، إذ رحل عن عالمنا فجر اليوم الأربعاء، إثر تعرضه لأزمة قلبية مفاجئة، ودعا محبوه ومتابعوه إلى الدعاء له بالرحمة والمغفرة.