"ضربني بوكس".. كواليس تطاول مستأجر على أستاذة جامعية ووالدتها بالمنصورة

تداول رواد مواقع التواصل الاجتماعي خلال الساعات الماضية مقطع فيديو يوثق لحظة تطاول على أستاذة جامعية ووالدتها الطبيبة وشقيقتها الصيدلانية، حيث تم سحلهم داخل مدخل عقارهم بمدينة المنصورة من قِبل مستأجر بإحدى الشقق السكنية.

عقار الرعب

وكشفت الدكتورة إيمان، إحدى الضحايا في الواقعة، وتعمل مدرس هستولوجي بكلية الطب جامعة حلوان، تفاصيل ما جرى، قائلة: "والدتي وأختي الصغيرة بيقعدوا لوحدهم في عقار ملك والدنا، وإحنا كنا كلنا مشينا منه، فاقترحت على ماما نأجر الدور الرابع لأي شخص، عشان يسليها بدل ما تقعد لوحدها في العقار".

وأضافت لـ"تليجراف مصر": "أجرنا الشقة لرجل مسن عمره فوق الـ80 سنة، ومعه زوجته القعيدة، ووقعنا عقدًا لمدة سنتين، وهما طلبوا نمده لـ3 سنين ووافقنا، الاتفاق كان على إيجار 3 آلاف ونصف لشقة 170 مترًا، وتأمين 6 آلاف جنيه، وبالفعل دفعوا التأمين، وتاني يوم طلبوه تاني بحجة دهن الشقة، ووافقنا من باب حسن النية".

سرقة كهرباء

وتابعت: "كانوا منتظمين في دفع الإيجار سنة ونص، وكانت والدتي بتحصّل منهم الكهرباء، وكل شيء ماشي تمام، لكن بعد ما والدتي عملت عملية كبيرة في العمود الفقري وبقت حركتها صعبة، اقترحت عليها تدفع الفواتير من خلال فوري، وبلغت الراجل بحسن نية، ومن هنا بدأت خيانة الأمانة، لأنه لمدة 5 أشهر ما دفعش كهرباء".

وأشارت إلى أن والدتها لاحظت زيادة غير طبيعية في عداد شقة شقيقها المسافر بالدور الأول، رغم أن الشقة مغلقة، وبعد البحث، اكتشفت أن موتور المياه التابع للمستأجر موصل على العداد، لم تواجههم وقتها، وطلبت منهم فواتير الكهرباء، فردوا بأن الفواتير ضاعت.

وأكملت: "ماما توجهت لشركة الكهرباء، وبلغتهم، فرفعوا العداد وركبوا واحد بكارت، وسددت ثمن العداد كامل دون تقسيط، وبسبب الفواتير المتأخرة، اتحسبت عليهم ممارسة، لكن المستأجر بدأ يماطل ويرفض السداد، والدتي أخذته لشركة الكهرباء، وهناك سمع بنفسه إنه لازم يدفع باعتباره المقيم في الشقة".

دعوى طرد

وتابعت: "من شهر 8 لشهر 12 امتنع عن دفع الإيجار، وبقت معاملتهم سيئة، ابن المستأجر بدأ ينزل يقفل النور على والدتي وأختي وهما قاعدين لوحدهم، وابتدى يتلفظ بألفاظ غير لائقة، ومن وقتها عرفنا إنهم بلطجية، في شهر 12، دفع الإيجار المتأخر، وقال نبدأ صفحة جديدة، وماما وافقت رغم إننا كنا رافعين دعوى طرد لعدم السداد".

واستطردت: "ما عداش وقت ورجع السيناريو من جديد، ومن يناير لحد دلوقتي ما دفعش إيجار، وقال مش هدفع ومش همشي، واللي معاكم اعملوه، ماما رفعت دعوى تانية في يناير، راح المحكمة وزور فواتير شهور 3 و4 و5، وسدد إيجار شهر 6 داخل المحكمة".

طعن بالتزوير

وأكدت: "يوم الخميس اللي فات كنا قدمنا قضية طعن بالتزوير، فجاء وهددنا وقال: (هوريكم)، وتاني يوم، اللي هو الجمعة، كنا بنزور ماما، وقاعدين عادي، أنا وأختي، في التالت والخامس وهو في النص، أختي نازلة مع بنتها للدور التالت، لقته فاتح الباب وحاطط كرسي وبيقول: (أشوف كلـــب معدي عالسلم)".

تطاول مفاجئ

وتابعت: "في اليوم ده ما كنش فيه رجالة خالص، جوز أختي كان ماشي من يوم الخميس، والدتي كانت نازلة، فاحتبسها وقالها: (إنتي مش هتعدي)، وبدأ صوته يعلى، أختي جريت بسرعة علشان تفتح الباب للناس، لأنهم تطاولوا علينا في واقعتين قبل كده، وفضلت تصوت".

وأضافت: "أنا صحيت على صوت أختي، وطلعت بسرعة، فاتفاجئت بيه قابلني على السلم، ضربني في بطني، وقعت على ضهري، وبعدها إداني بوكس في وشي، وفضل دايس عليّا برجله، وشدني من شعري، عندي كدمات في عيني، ووالدتي كمان وشها فيه كدمات".

القبض على المتهمين

واختتمت: “إحنا مش بتوع مشاكل، ولا عمرنا اتخانقنا مع حد، وهو كان مبيّت النية يربينا في اليوم ده، لأنه ما حصلش أي خلاف أو مشادة في اليوم نفسه، والدتي كانت دايمًا بتقول (الجار للجار)، وحتى في فرح أخويا من كام شهر طلعنلهم كحك وبسكويت”.

ومن جانبها، ألقت قوات الأمن القبض على المتهمين، وجارٍ اتخاذ الإجراءات القانونية.