"الناس خافت تنقذنا".. أحد الناجين من عقار الساحل المنهار يروي لحظات الرعب (فيديو)

كشف أحد الناجين من العقار المنهار في منطقة الساحل بشبرا مصر، تفاصيل اللحظات المرعبة التي عاشها رفقة أقاربه داخل الطابق الأرضي.

كنا قاعدين بنفطر

وقال "رمضان حلمي"، أحد الناجين من عقار الساحل المنهار، عبر بث مباشر لـ"تليجراف مصر": “إحنا كنا 4 أشخاص قاعدين مع بعض في الشقة، وكنا قاعدين بنفطر مع بعض، وفي بيت جنبنا 6 أدوار وقع على البيت بتاعنا ووقع البيت معاه”.

لينا 14 سنة قاعدين في البيت 

وأضاف: “أنا ليا 14 سنة سايب بلدي الشرقية وقاعد في الشقة اللي في الدور الأرضي، وبنطلع أنا وقرايبي بنبيع كسكسي في الشارع، إحنا عشنا لحظات مرعبة لما البيت وقع علينا، كلنا طلعنا نجري لما لاحظنا البيت بيقع، بس أحمد جمال ملحقش يجري معانا علشان كان قاعد جنب الحيطة جوه والحيطة وقعت عليه، واتزنق حوه البيت هو ويوسف، بس يوسف خرج من تحت البيت عايش لكن أحمد جمال خرج ميت”.

الناس كانت خايفة تدخل تنقذنا 

وأكمل: “محدش حاول ينقذنا لأن الأهالي كانوا خايفين يدخلوا السكن جوه يطلعوا حد، وفضلنا نستغيث بالناس ونقول بصوت عالي الحقونا ياجدعان، بس محدش قدر يقرب خالص، وابني عمر كان برة بيجيب حاجات وشاف البيت وهو بيقع وفضل يستغيث بالناس علشان تلحقنا”.

وقال الطفل عمر نجل أحد الناجين من العقار، والشاهد على اللحظات الأولى لواقعة الانهيار: “أنا خرجت أجيب حاجات من برة وشوفت تراب طالع من البيت العالي اللي جنبنا، وروحت لبابا وقولتله البيت هيقع، قالي هتلاقي حد في البيت بيدق حاجة، وفضلت واقف بره ببص على البيت لغاية لما لقيته بيقع”.

وأضاف عمر: “أبويا وعم علاء كانوا جوه البيت لما وقع، بس الحمد لله لحقو نفسهم، وشوفت بابا بيشاور بصباعه تحت البيت وطلعناه، وسمعنا أحمد عبود بينادي وبعدها كان بيطلع في الروح، ولما طلعناه لقيناه مات”.