ختم القرآن 12 مرة ويحلم بالعمرة.. أول ظهور لبطل فيديو رش الكلاب بالمياه
بسمرة مصرية خالصة من طمي سوهاج، وملامح فاضت منها البراءة والرحمة، وبسمة حفرت مكانها في وجهه البشوش، أطل عامل مغسلة حلمية الزيتون في ظهوره الأول في لايف تليجراف مصر، بعد تصدر فيديو رشه لكلاب المنطقة بالمياه لحمايتهم من الحر، فماذا قال؟
الظهور الأول لعامل مغسلة حلمية الزيتون
في حديثه لمراسل تليجراف مصر لأول مرة، قال محمود عامل مغسلة حلمية الزيتون عن الفيديو المنتشر: "والله كنت برش ماية عادي كدا على الكلاب، لقيت واحد مصورني، وتاني يوم أستاذ تامر-صاحب المغسلة- قالي أنتَ طلعت تريند وكدا، فأنا مكنتش مصدقه كنت بحسبه بيهزر معايا في الأول، ولكن بعد ما طلعت تريند وشوفت الفيديو".
وأضاف: "لما شوفت الفيديو قلبي ارتاح جدًا، والفرحة مش سايعاني لحد دلوقتي، حاسس إن أنا بحلم والله، وأخويا الكبير فرح وضحك معايا وباقي أخواتي وأختي وأبويا كلهم دعولي، حسيت إني فخور بنفسي الحمد لله وكله بفضل ربنا سبحانه وتعالى، وفرحت جدًا".
أمر معتاد ومتكرر واتربينا عليه
وأضاف محمود أنه اعتاد على تلك السلوكيات منذ زمن طويل، فعهد الاهتمام بالحيوانات وتلبية احتياجتهم رفقة العاملين معه وأصحاب المحلات الأخرى بالمنطقة: "أنا دايمًا برش الكلاب في الشارع وأستاذ تامر هو اللي علمني، لقيته بيعمل كدا، فاتعلمت منه وبقيت بعمل كدا كل شوية، لحد ما صادف وحد صور وعمل فيديو".
وهنا تدخل تامر صاحب المغسلة، ليضيف قائلًا: "إحنا اتعودنا نرش الكلاب ونروق عليهم ونحميهم، لأن دي روح في الأول وفي الآخر، ومحمود من الناس المؤدبة وحافظ القرآن والناس كلها بتحبه، وبيتعامل مع الزباين بشكل كويس وأنا أعرفه من أول ما كان عنده 9 سنين".
واستطرد: "إحنا بنتعلم من بعض وده خير ولازم كلنا نعمله، وبقول للناس اللي كتبت تعليقات كويسة على الفيديو ياريت تشرفونا في مكانا هنا، ده شرف لينا".
وعند سؤاله عن فكرة الخوف من الكلاب أو قيامهم بردة فعل عنيفة، كان رده: "متخافش من فعل الخير لأنك بتعامل ربنا قبل كل شيء، حط ربنا قدامك قبل أي حاجة، الحيوانات بترحم بعضها أكتر من البشر".
الرأفة بالحيوان جزء لا يتجزأ من الحياة
وزاد محمود عن سلكه لنهج الرأفة والرفق بالحيوان كجزء أساسي في حياته: "لو شوفت كلب أو قطة في الشارع طبعًا بأكلها وبشربها، وبقتدي بالرسول صلى الله عليه وسلم في كدا، وبسيدنا سليمان عليه السلام لما رأف بحال النملة والنملة دعتله".
واستطرد: "ختمت القرآن 12 مرة، ونفسي أعمل عمرة لأبويا، وأبويا يعمل عمرة لأمي الله يرحمها، ونفسي أعمل عمرة بصراحة، وأزور سيدنا محمد والكعبة، أبويا أول واحد يعمل العمرة وأنا تاني واحد ده حلمي".
ووجه محمود رسالته بعد انتشار الفيديو “أرجوكم بلاش ضرب في الحيوانات وبلاش ضرب لا في حمار ولا في حصان، ولا في القطط ولا في الكلاب، مينفعش نأذيهم حرام، وبعدين يعني الحيوانات دي بتحس زينا، لو اتكرر نفس الضرب للإنسان هيوجعه أكتر، ولازم نأكلهم طبعًا ونشربهم، وأبويا علمني كدا بردو أبويا بيحب يأكل الحمام وحببني فيه جدًا من الصغر”.
عائلة محبة وداعمة
وتطرق محمود للحديث عن عائلته ونشأته قائلًا: "أنا من جرجا بسوهاج، وعندي 4 أخوات وأكتر ناس بحبهم أخواتي وقبلهم أبويا، ودايما أبويا بيدعمني وبيعلمني كل حاجة".
وأضاف: "المثل الأعلى ليهم هو أخويا الكبير، ودايما بيدعمني وهو سند وضهر ليا زي أبويا".
وأكمل: "أنا مش متعلم ومعايا شهادة محو أمية، الأول كنت عامل نضافة في الإنتاج الحربي وكلهم هناك كانوا بيتعاملوا معايا بشكل كويس خاصة المشرفة المسؤولة عني، ومشرفة هناك علمتني إزاي أكتب وإزاي أقرأ، وخدت من هناك شهادة محو الأمية".
وتابع: "وبحب كل المتابعين اللي بيدعولي، والناس كلها كويسة معايا وأستاذ تامر أخويا الكبير، ومفيش حد بيتعامل معايا وحش، لأن دي دعوة أمي قالتلي روح يابني ربنا يحبب فيك خلقه، الحمد لله".

الأكثر قراءة
-
بيان مهم من "الرعاية الصحية" بعد إصابة إمام عاشور بـ"فيروس A"
-
دبوس معدني وقطع فول.. فريق مجمع الأقصر الطبي ينقذ صغيرتين من الاختناق
-
مفاجأة في تحاليل عينات لاعبي الأهلي بعد إصابة إمام عاشور
-
رغم افتتاحه رسميا.. تصريف المياه أزمة تهدد سد النهضة
-
طرد وحرمان.. عمرو الدجوي يطلب من النائب العام استدعاء جدته نوال
-
تخفيض سعر شيري تيجو 7 موديل 2026 بقيمة 81 ألف جنيه
-
مترجم مصري يعيد طفلة تائهة في تونس لأسرتها.. كيف ساعده ChatGPT؟
-
عندما يرفع السيسي صوته في وجه إسرائيل

أخبار ذات صلة
مترجم مصري يعيد طفلة تائهة في تونس لأسرتها.. كيف ساعده ChatGPT؟
16 سبتمبر 2025 03:20 م
الشقة بقت ملكنا.. أول تعليق من مريم النشار بعد استرداد حقها (خاص)
16 سبتمبر 2025 12:40 م
بعد نشر "تليجراف مصر".. تفاصيل تكريم الطالبة آية بمستشفى 57357 (خاص)
15 سبتمبر 2025 09:05 م
بعد وفاة ابنتها.. أول تعليق من والدة الطفلة الفلسطينية "جوري" (خاص)
15 سبتمبر 2025 05:54 م
موظف بـ"نايل لينين" يكشف تطورات جديدة في واقعة الرضيعة وأمها (خاص)
15 سبتمبر 2025 04:47 م
"المشردة المثقفة".. "ولاء" أنهكتها قسوة الحياة فقررت عشق الشارع
15 سبتمبر 2025 09:51 ص
ستارة بيضاء وإضاءة كلاسيكية.. صور الفتيات في أحضان المشاهير بالـ AI تثير الجدل
14 سبتمبر 2025 10:04 م
أمل أصابه الشلل.. "تالا" تُحلم بـ"البالطو الأبيض" فوق كرسي متحرك (فيديو)
14 سبتمبر 2025 03:53 م
أكثر الكلمات انتشاراً