ياسمين عز: "الصيف موسم الطلاق والخناق ومتتجوزيش قبل شهر أكتوبر"

أعربت الإعلامية ياسمين عز بأسلوب يميل إلى السخرية عن رأيها بشأن ارتفاع درجات الحرارة، مقدمة نصائحها المعتادة للسيدات حول كيفية التعامل مع أزواجهن في ظل هذه الأجواء الحارة.

موسم الخناق والطلاق

وقالت ياسمين عز، خلال برنامجها “كلام الناس” المذاع عبر قناة mbc مصر: “الفترة دي موسم الخناقات والطلاق كتير، استخبي ومتعمليش حاجة إلا لما شهر 9 يعدي، هتلاقي جوزك توماس أديسون مخترع اللمبة المحروقة بيدور على المشاكل، أي مشكلة بيخلقها مترديش واسمعي كلامي، خليكي ساكتة”.

وأضافت ياسمين عز خلال حديثها: “الناس خلقها ضيق من الحر، وأنا لو مش مذيعة ومضطرة أطلع أتكلم كنت طلعت ساكتة، لو ده مسموح إعلاميًا كنت طلعت ساكتة، أنا عايزة أقعد في البيت ساكتة، ده موسم قطع العلاقات وممكن يطلقك في غمضة عين وهو أصلًا بيتلكك احبطي مخططاته”.

الزواج في أكتوبر

كما نصحت ياسمين عز الفتيات اللواتي يخططن للزواج بأن يؤجلن الفكرة تمامًا في هذا الوقت، وأوضحت قائلة: "محدش يتجوز دلوقتي، استنوا على الأقل لحد شهر 10.. الصيف مش وقته أبدًا".

واستكملت عز: "لو ناوية تبدأي حياة جديدة، استني الجو يبرد شوية.. لأن الأعصاب في الحر مش مستحملة أي مشادات، وممكن تبدأي حياتك بخناقة كبيرة بدل فرحة".

وفي وقت سابق، علقت ياسمين عز، على الأنباء المتداولة بشأن انفصال الفنان كريم محمود عبد العزيز، وزوجته آن الرفاعي، بعد زواج دام 14 عامًا.

وقالت عز، خلال برنامجها “كلام الناس”: “طلاق كريم محمود عبد العزيز وزوجته تصدر الترند، رغم أن أصحاب الخبر لم يعلنوا الخبر بشكل رسمي، لكن كل المواقع أعلنته، وطالما المواقع أعلنته يبقى مؤكد بشكل كبير، وطول ما إحنا عايشين فيه ناس بتطلق وناس بتتجوز وفيه ناس هتموت”.

واستكملت: "اللي يخصنا إننا لازم نحترم المساحة الشخصية ليه كفنان وإنسان، وزي ما جوزك محمد طلقك السنة اللي فاتت عادي كريم محمود عبد العزيز انفصل ما جبناش سيرة محمد يبقى مانجبش سيرة كريم محمود نسيب الناس في حالها ونحترم الحياة الشخصية وربنا يعوضهم".