مأساة حبيبة نبيل.. الأم: عاوزة حق 18 سنة اجتهاد انتهت بشهادة وفاة

حصلت حبيبة نبيل، الطالبة بالثانوية التجارية، على مجموع 94%، وكانت تحلم بالالتحاق بالجامعة، لكن أحلامها انتهت أسفل عجلات سيارة طائشة، دهستها أثناء عملها على سيارة لبيع القهوة بطريق دهشور في منطقة حدائق أكتوبر؛ ليتحول الأمل إلى ألم يتجدد كل حظة.

كانت شغالة على عربية قهوة 

والدة حبيبة قالت عبر بث مباشر لـ"تليجراف مصر"، بنتي كانت شغالة على عربية قهوة بطريق دهشور في حدائق أكتوبر، علشان تساعد في المصاريف، وكانت واقفة بعد الرصيف اللي موجود على الطريق، وكانت ملتزمة جدًا في دراستها وبتاخد دروس علشان تجيب مجموع كويس وتدخل الجامعة، ونجحت وجابت مجموع 94%.

كل الناس بتحلف بأخلاقها 

وأضافت والدة حبيبة، “كانت يوميًا بتروح من شغلها لدروسها ومن دروسها لشغلها، وكانت مش بتفوت فرض ودايمًا بتقرأ قرآن، وكل الناس كانت بتحلف بأخلاقها، وجزائها أن واحد طايش راكب عربية خبطها وموتها بكل بساطة، وقتل حلمها معاها، كان حلمها أنها تفضل تشتغل وتدخل الجامعة وتتوظف علشان تقعدني من شغلي وتصرف عليا”.

مش عاوزين يوروني بنتي في المستشفى 

وأكملت والدة حبيبة، “أبوها اتصل بيا وقال لي روحي على المستشفى عشان في ناس كلموني وقالوا لي إنها عملت حادثة، وروحت جري على المستشفى مش لقياها وبسأل الناس عليها محدش عاوز يقولي هي فين، ولقيت واحد قاعد على كرسي بعجل قلت له أنت كنت معاها في الحادثة قال لي أيوه أنا كنت في نفس الحادثة، وواحدة ممرضة قالت لي لأ ده نزل معاها من عربية الإسعاف وهو اللي داسها”.

وأضافت والدة حبيبة، "بعد كده روحنا القسم واتفاجأت أن اللي عامل نفسه متصاب معاها في الحادثة ده هو اللي داسها، وبيقول بكل بساطة في القسم أيوة أنا اللي دستها، وبيتكلم وكأن قلبه حجر ومعندوش أي إحساس".

واختتمت والدة حبيبها لـ"تليجراف مصر"، بقولها “المتهم اللي قتـل بنتي لازم يدفع التمن ويتحبس، مش يدفع غرامة ويطلع من القضية وخلاص، أنا عاوزة حق 18 سنة عشتها مع بنتي المجتهدة، وكانت بتتمنى أنها تدخل الجامعة، وكان نفسي أشوفها بتكبر وتفرح قدامي كل يوم وأفرح بيها، مش في الآخر ألاقي إن كل اللي اتبقى منها شهادة وفاتـها بس”.

جالي تليفون قالولي بنتك عملت حادثة 

ومن جانبه قال والد الطالبة حبيبة لـ"تليجراف مصر"، “أنا شغال عامل نظافة في شركة من الساعة 10 بالليل لـ8 الصبح، وجالي تليفون من بنت أختي وأنا في الشغل، قالت لي حبيبة عملت حادثة على الطريق، بقولها إزاي عملت حادثة، قالت لي عربيتين عملوا حادثة ومنهم واحدة خبطت في بنتك وهي واقفة، وجريت على مستشفى أكتوبر، ولقيتهم مش عاوزين يدخلوها العناية المركزة”.

كانت راجل مش بنت

وأضاف والد حبيبة: “حبيبة كانت راجل مش بنت، وكانت دايما بتعتمد على نفسها، وأنا كنت بعاملها إنها ابني مش بنتي، وفي الآخر ماتت، عربيتين بيسابقوا بعض على الطريق وعربية منهم خبطتها، وبنتي كانت واقفة بعيد عن الطريق بمسافة 20 مترًا والعربية زحفت لغاية لما دهستها، واتصابت بكسر في الرقبة، وكسر في الحوض، ونزيف داخلي في المخ، غير باقي الإصابات اللي في باقي الجسم”.

وأكمل والد حبيبة: “لما روحت المستشفى وشفت بنتي في المنظر ده حسيت أن نار مولعة في جسمي، والمسؤولة عن ثلاجة المـوتى قالت لنا إن فيه حد جه قبلكم وكان عاوز ياخد تقرير الوفـاة، وقال لنا هوديه القسم، واكتشفنا أنه تبع المتهم وكان عاوز يخفي جريمته”.

الشاهد غير أقواله

وأوضح والد حبيبة قائلًا: "كان في طرف تاني في الحادثة ظهره اتكسر، وهو المفروض أنه كان شاهد بس غير أقواله، وكان في واحد تبعه هو اللي ساعدنا في مكان الحادثة ووصلنا القسم، ولقيت ناس كتير هناك منهم واحد نايم في عربية ميكروباص وضهره مكسور، ودخلت على الظابط اللي بيكتب المحضر ومعايا التقرير الطبي".

وتابع والد حبيبة: “لما قابلت المتهم وقلت له أنت اللي خبطت بنتي وموتـها، قال لي حسبي الله ونعم الوكيل فيك، ومسكت فيه جوه القسم، وكان بيتريق على شكلي، وأمين الشرطة  أخد أقوالي ومضاني على المحضر، ورقمه 2872 جنح حدائق أكتوبر لسنة 2025”.

واختتم والد حبيبة حديثه لـ"تليجراف مصر" قائلًا: أنا عاوز حق بنتي مش عاوز حاجة أكتر من حقها، بس نفسي حق بنتي يرجع لي".