"كنت من الأوائل ومش مصدق النتيجة".. صدمة طالب ثانوية بالفيوم بعد حصوله على 62%

تعرض الطالب حسام أحمد، أحد المتفوقين بمدرسة جمال عبد الناصر الثانوية العسكرية بالفيوم، لصدمة شديدة عقب حصوله على مجموع 62% رغم اجتهاده الملحوظ طوال العام الدراسي.

مجهود عام كامل ضاع في لحظة

وقال حسام أحمد، في تصريحات لـ"تليجراف مصر": "ماكنتش متوقع أبدًا إن درجتي تطلع كده، أنا طول السنة كنت بذاكر ليل ونهار وضغطت على نفسي بشكل كبير في تالتة ثانوي على عكس تانية ثانوي اللي جبت فيها 89%”.

وأضاف: “كنت بحلم أجيب أعلى الدرجات وأدخل الكلية اللي بحلم بيها لكن النتيجة دي كسرتني فعلًا”.

والدة حسام: “ابني اتظلم.. ونطالب بإعادة التصحيح”

وقالت والدة الطالب: “ابني اتظلم، كان دايمًا من الأوائل، وبيذاكر ساعات طويلة جدًا مكنش بيخرج ولا حتى بيقعد مع أصحابه كل وقته كان للمذاكرة إحنا مش مصدقين النتيجة وبنطالب بإعادة تصحيح أوراقه لأنه مستحيل يكون جاب الدرجة دي”.

مطالب بمراجعة أوراق الإجابة

وطالب حسام وزارة التربية والتعليم بإعادة النظر في أوراق إجابته، مؤكدًا ثقته في وجود خطأ بالتصحيح أو نقص في الدرجات.

وأوضح: “أنا متأكد إن فيه خطأ، وحرام اللي حصل لأن ده مجهود سنة كاملة ضاع وحُرمت من دخول الكلية اللي بحلم بيها”.