جمال عبد الحميد: "مصطفي محمد خليفتي لو مراحش الأهلي وكولر اتظلم"

يرى جمال عبد الحميد نجم منتخب مصر الأسبق أن السويسري مارسيل كولر مدرب الأهلي السابق تعرض للظلم بعد مسيرته التاريخية مع القلعة الحمراء.

وقال جمال عبد الحميد خلال تواجده ضيفًا مع عمر ربيع ياسين ببرنامجه "مان تو مان" عبر صفحته الرسمية: "كولر خد كل البطولات مع الأهلي، مفيش بطولة شارك فيها إلا وفاز بيها، وفي الآخر رموه بالأزايز".

وأضاف "كولر أول لما خسر إفريقيا جمهور الأهلي حدفه بالأزايز".

وتابع "ياسر إبراهيم الكورة جت في رجله غصب عنه دخلت جول، ليه أضرب المدرب؟ ودي كورة في الآخر".

جمال عبد الحميد: مصطفي محمد خليفتي لو مراحش الأهلي

يرى جمال عبد الحميد، نجم منتخب مصر الأسبق، أن مصطفى محمد مهاجم نانت الفرنسي هو الأقرب لخلافته في الملاعب، لكنه اشترط ألا ينتقل اللاعب إلى صفوف الأهلي.

وواصل "أنا بحب مصطفى محمد وبعتبره خليفتي، بس مش عايزه كل شوية يقول مش هلعب للأهلي وفي الآخر ألاقيه ماضي من سنة وعامل إعلان".

وأكد "نفسي مصطفى محمد يكون صريح، يعني لو جاله عرض من الأهلي يتكلم بصراحة زي أكرم توفيق لما راح الشمال القطري".

وأتم "لو مصطفى محمد راح الأهلي مش هيبقى خليفتي.. وساعتها مش هعرفه".

جمال عبد الحميد: زيزو لاعب عادي مش جامد

يرى جمال عبد الحميد، نجم منتخب مصر الأسبق، أن أحمد مصطفى زيزو، الوافد الجديد للنادي الأهلي من صفوف الزمالك، لاعب عادي وليس مميزًا.

وقال "إمام عاشور وبن شرقي مشيوا من الزمالك وخدنا بطولات، وبردو هناخد بعد ما زيزو مشي".

وواصل "زيزو مش لاعب جامد أوي يعني، لاعب عادي، الزمالك هو اللي لمّعه، هو بتاع أوفر وضربة جزاء".

واختتم حديثه "زيزو مش هو أبو تريكة مثلاً، ولا شيكابالا، ولا لاعب حريف يمزجك.. لاعب كانوا نجوم الزمالك بيحبوه فكانوا شايلينه، وبيخلوه يشوط ضربات جزاء".