هل تجاوزت رانيا محمود ياسين في حقها.. شهيرة تكشف الحقيقة؟

خرجت الفنانة المعتزلة شهيرة عن صمتها، للرد على الانتقادات التي وُجّهت لابنتها الفنانة رانيا محمود ياسين، عقب تصريحاتها الأخيرة التي أُسيء فهمها على أنها انفعال تجاه والدتها، وأثارت جدلًا واسعًا على مواقع التواصل الاجتماعي.

شهيرة: "انفعال رانيا عليّ.. هو أي كلام يتقال وخلاص؟"

ونشرت شهيرة عبر حسابها الرسمي بموقع “فيسبوك”، منشورًا اليوم، كتبت فيه: "إيه اللي حصل؟! ليه الناس بقت قاسية بالشكل ده؟! ما حدش بقى بيسيب حد في حاله، وخصوصًا الفنانين.. انفعال رانيا على شهيرة؟! هو أي هبد يتقال علينا وخلاص".

"إحنا ناس محترمة وشبعانين"

وأضافت شهيرة: “أنا أولادي متربين، وإحنا من عائلة ليها جذور وأصل قبل ما ندخل مجال الفن، وإحنا ناس محترمة وشبعانين، ومش محتاجين نثبت ده لحد، وطبيعي جدًا إن أي إنسان ينفعل لو اتعرض للإهانة من شخص، لكن ينفعل على أمه أو أبوه؟! ده شيء ما حصلش ولا ممكن يحصل”.

وتابعت: “أن كلام مالوش أي لازمة بيتقال للأسف، وكأن كله بقى زي بعضه! الناس اللي عايشة في حالها بقت زي اللي بتفتعل المشاكل علشان الترند وعدد المتابعين، وبيحاولوا يشوهوا صورة الناس المحترمة عشان يركبوا الموجة ويكسبوا قرشين من وراهم”.

 "حسبي الله في كل من يؤذي الناس بالكلام"

واختتمت قائلا: "حرام اللي بيحصل، وحسبي الله ونعم الوكيل في كل من يؤذي غيره بالكلام، إحنا محتاجين قانون يحمي الناس من الآفات دي، وهل يُكبّ الناس على وجوههم يوم القيامة إلا حصائد ألسنتهم؟".

رانيا محمود ياسين تكشف كواليس الموقف مع والدتها

كشفت الفنانة رانيا محمود ياسين، عبر حسابها الرسمي على "إنستجرام"، كواليس الموقف الذي جرى مع والدتها الفنانة شهيرة داخل فعاليات المهرجان، موضحة أنها شعرت بالخوف الشديد عليها وسط الزحام.

وقالت: "الناس على السوشيال ميديا بقوا طاقة غضب وكره وتصيد للفنان، وأي موقف عادي بيتحوّل لقصة، والصفحات الصفراء بتعمله ريتش علشان تشوه صورتنا قدام الناس. أنا كنت بدوّر على أمي ومش لاقياها، ولما لاقيتها قالوا انفعال رانيا على أمها! أنتم بترصدوا أنفاسنا بكاميراتكم".

وأضافت رانيا أنها كانت تمر بظروف صعبة خلال المهرجان، خاصة بعد تعرض زوجها الفنان محمد رياض، رئيس المهرجان، لوعكة صحية، قائلة: "جوزي كانت حرارته عالية وما زالت، ولولا فضل ربنا ثم الدكتور اللي نزل رغم تعبه علشان مسؤوليته، ماكنّاش هنعرف نكمل. وبرضه قالوا رانيا بتخزي العين! إيه التفكير ده؟".

كما أشارت إلى أنها تعرضت لإصابة أثناء مرورها على السجادة الحمراء، قائلة: "وقعت على الريد كاربت، وحصل التواء في قدمي، وكنت في حالة صعبة، وربنا أعلم بيا، ومع ذلك قالوا إنها بتعمل لقطة علشان ما سمحتش لحد يصورني! أولًا ده مايرضيش ربنا، وثانيًا دي مش طريقتي ولا أسلوبي".

مهرجان القومي للمسرح المصري

يُذكر أن فعاليات الدورة الـ18 من المهرجان القومي للمسرح المصري انطلقت مساء الأحد الماضي على المسرح الكبير بدار الأوبرا المصرية، بحضور وزير الثقافة د. أحمد فؤاد هنو، ورئيس المهرجان الفنان محمد رياض، ومدير المهرجان د. عادل عبده، وبمشاركة نخبة من نجوم المسرح والدراما.