لاعب الأهلي السابق يهاجم محمد فضل: "غدرت بالنادي اللي صنعك"

هاجم لاعب الأهلي السابق، محمد جودة، زميله السابق محمد فضل، قائلا إن الخروج من النادي لا يعني خصومة، وأن الانتماء يُختبر بعد الرحيل.

وأوضح جودة في منشور عبر فيسبوك: "بعض الناس كان للنادي الأهلي فضل كبير عليهم، سواء وهم لاعبين أو بعد الاعتزال، لما فتح لهم بابه واحتضنهم إداريًا وفنيًا.. لكن لما خرجوا من المنظومة، اختاروا يكونوا خصومًا مش نقادًا".

وأضاف: "الأمانة والانتماء مش بينتهوا بخروجك من الباب، بالعكس، بيظهروا وقتها أكتر، اللي ينسى الجميل، ويفشي أسرار بيته، ويتحول لمعَارض دائم، وبعدين لما يمسك منصب رسمي يشتغل ضد النادي اللي صنع اسمه، ده مش ناقد.. ده شخص اختار يغدر بالتاريخ اللي صنعه".

وأتم: "النقد البنّاء مقبول، والاختلاف الصحي مطلوب.. لكن هدم الكيان اللي قدّم لك كل شيء، ده اسمه نكران للجميل. الأهلي لا يضره خروج شخص، لكن الشخص هو اللي يخسر كتير لما يخرج من الأهلي ويجعل خروجه خصومة واضحة".

فضل يوجه رسائل قوية لمنتقديه

وفي وقت سابق، وجّه محمد فضل، نجم الأهلي السابق، رسائل قوية لمنتقديه، ردًا على الهجوم الذي تعرض له مؤخرًا من بعض جماهير القلعة الحمراء، مؤكدًا أن مواقفه نابعة من حرصه على مصلحة النادي وليس العكس.

وقال فضل، خلال ظهوره على فضائية "دي إم سي": "أنا بتحدى أي حد يطلع يواجهني على الهواء ويكذب كلمة واحدة من اللي بقولها، كل اللي بقوله حقائق مش آراء شخصية".

وأوضح: "كل ما أتكلم في نقطة أو أقول رأيي في ملف معين، اللجان الإعلامية بتحول الموضوع لمشكلة شخصية. لما قلت إن الإدارة القانونية في الأهلي عندها أزمة في عقد كولر، فجأة بقى عندي مشكلة مع الأهلي!".

وتابع: "أنا ابن النادي وكلنا بنحبه، لكن لما مسؤول يخطئ ويوافق إن مدرب زي كولر يحصل على 170 مليون جنيه، ده ضرر للنادي.. انتقادي للغلط مش هجوم على الكيان، ده خوف على الأهلي اللي تربينا فيه".

وأكد فضل أن النقد البناء لا يعني الخصومة، بل هو واجب على من يحب النادي ويخشى عليه من أي قرارات خاطئة قد تؤثر على مستقبله.