شكري نجيب: العقود "تحت الترابيزة" أزمة تهدد الكرة المصرية

تحدث شكري نجيب، لاعب المقاولون العرب الحالي، عن أبرز المحطات في مسيرته الكروية، مؤكدًا أن تجربته مع نادي الاتحاد السكندري كانت الأصعب على الإطلاق، بسبب ما واجهه خلالها من غموض واختلافات في الوعود والاتفاقات، رغم أنه حصل على حقوقه القانونية كاملة.

وقال نجيب في تصريحات إذاعية لبرنامج "نجوم دوري نايل" مع الإعلامي أحمد المصري عبر أون سبورت إف إم، إنه لا يهتم بمواقع التواصل الاجتماعي، ويفضل التركيز في عمله داخل الملعب، موضحًا: "بعد التمرين بروح لأولادي وزوجتي، ومش حابب أشوف حاجة تضايقني، فمابتابعش السوشيال ميديا."

تجربة الاتحاد السكندري

وعن تجربته مع الاتحاد السكندري، أوضح نجيب: "انضميت للفريق في يناير بعد التألق مع فاركو، لكنها كانت أصعب 4 شهور في حياتي، كل يوم فيه حاجة بتتغير، اتفقنا على أمور كتير، تاني يوم لاقيتها اتغيرت، قالولي ماتقلقش رئيس النادي معاك، فجأة اختفى ومبقتش عارف أتعامل إزاي."

وأضاف: "على الورق خدت حقي وزيادة، لكن للأسف في مصر في فلوس بتتقال تحت الترابيزة، ومفيش ضمانات، ودي مشكلة بتواجه كتير من اللاعبين وتهدد استقرار الكرة المصرية."

انتقالات اللاعبين بين الأهلي والزمالك

وتطرق نجيب للحديث عن انتقالات اللاعبين بين الأهلي والزمالك، مؤكدًا أنه لم يكن يتوقع ذلك في السابق، لكن عصر الاحتراف غيّر كل المعادلات، وأصبح العامل المادي هو الحاسم، مؤكدًا في الوقت ذاته رفضه للطريقة التي تُدار بها الأمور عبر مواقع التواصل قائلاً: "الموضوع بقى أوفر، وبقى ممكن يولّد فتنة، وإحنا في النهاية بنلعب رياضة ترفيهية، مش أكتر."