محمد علي رزق: أمي باعت ذهبها ونزلت الشارع تشتغل علشان تربينا

روى الفنان محمد علي رزق كواليس مؤثرة من حياته الشخصية، متحدثًا عن كفاح والدته في تربيته هو وإخوته بعد انفصال والديه، وواصفًا إياها بأنها "كل حياته" وصاحبة الفضل الأول في تكوين شخصيته، كما تحدثت والدته أيضًا عن علاقتها به ومدى فخرها به.

مش بس أمي دي حياتي كلها

قال رزق خلال ظهوره في بودكاست مع شريف إدريس عبر “تليجراف مصر”: "أمي دي مش بس أمي، دي حبيبتي وقلبي وروحي وعقلي، هي حياتي كلها، أي حد شايف فيا حاجة حلوة فهي منها، وأي حاجة مش حلوة فهي من طباعي الشخصية بعيد عنها".

بحس إنه أخويا الكبير وفخورة بيه جدًا

ومن جهتها، عبرت والدة محمد علي رزق عن حبها وفخرها الشديدين بابنها، من خلال تسجيل صوتي، قائلة: “محمد إنسان طيب وحنين وراجل جدًا، بعتمد عليه في كل حاجة، وساعات بحس إنه أخويا الكبير مش ابني الصغير”، مضيفة "أنا فخورة بيه وفرحانة إن الناس بتقول له إنه محترم، لأنه فعلًا بيتقي ربنا وبيعرف ربنا كويس".

باعت دهبها ونزلت تبيع في الشارع

وتحدث رزق عن التضحيات الكبيرة التي قدمتها والدته بعد انفصالها، حيث تولت تربية ثلاثة أبناء بمفردها، رغم أنها كانت من عائلة ميسورة الحال.

وقال:"أمي نزلت الشارع تبيع إكسسوارات بعد ما باعت دهبها و3/4 ورثها، كانت بتقعد على 6 بلاطات قدام السوبر ماركت علشان تصرف علينا، وده كان بعد ما كانت هانم من عيلة غنية ومدارس راهبات ودادة خاصة".

فطرنا بـ2 جنيه فول وطعمية

وتحدث عن واحدة من أصعب اللحظات، قائلًا:"في مرة مصروف البيت اتأخر، فجمعنا الشلينات من شنط ماما الحريمي، ولمينا 2 جنيه، جبنا بيهم فول وطعمية وعيش وفطرنا، والغداء كان مكرونة مسلوقة بالملح والفلفل، ومفيش صلصة".

وأضاف:"ماما طفت نور الشقة كله، وقعدنا في أوضة واحدة مشغلين التلفزيون عشان لو حد خبط نعمل نفسنا مش موجودين، مفيش حتى شاي نضيفه".

أمي علمتني أكون راجل وأحافظ على بنات الناس

واستعاد رزق، موققًا جمعه بوالدته خلال فترة مراهقته، حين أخبرها أنه بدأ علاقة مع فتاة، فقال:"مكنتش عارف أحكي لمين، رحت حكيت لماما، وبدل ما تنفعل، سمعتني للنهاية، وقالت لي حافظ عليها زي ما تتمنى الناس تحافظ على أختك".

وأضاف:"خلتني أشوف الدنيا بشكل مختلف، خلت ضميري يصحى، ومن ساعتها كل بنت دخلت حياتي حاولت أحافظ عليها".

مهما أعمل مش هعوضها

اختتم محمد علي رزق حديثه بتأثر شديد، قائلاً:"مهما أعمل مش هعوض أمي عن اللي قدمته، اللي عملته ما يتقارنش بأي حاجة في الدنيا، ربنا يبارك لي في عمرها وتفضل راضيه عني دايمًا".