الكورة مع ماهر : لماذا فشل الأهلي في أول اختبار بالدوري

بتشكيل شبه متوقع كانت المفاجأة فيه مشاركة شوبير على حساب الشناوي وأحمد رضا على حساب ديانج بدأ الأهلي الموسم الجديد المشتعل من بدايته أمام مودرن اللي عمل بداية هجومية لمدة خمس دقايق وبعدها بدأ مرحلة ركن الأتوبيس....وبدأت سيطرة الأهلي على الأمور وإن كانت سيطرة بدون فعالية نتيجة إن الكابتن مجدي عبد العاطي ضيق الملعب في التلت الأخير ومن حظه الكويس الظهور الباهت لنجوم الأهلي باستثناء زيزو ورضا علاوة على إن مودرن لعب بزيادة واحد اللي هو قفشة وبالتالي ممكن نعتبر الأهلي كان بيلعب ناقص لعيب ....ورغم هتاف الجمهور "إلعب بحماس ...اسمع صوت الناس " لكن الأهلي لا لعب بحماس ولا سمع صوت الناس لدرجة إن عدى من زمن الشوط الأول 42 دقيقة اللي فيها سدد تريزيجيه أخطر تسديدة وعدت بجوار القايم...وأنهى طارق مجدي الشوط اللي توقف فيه اللعب ست مرات وظهرت فيه الأطقم الطبية أكتر من محمد شريف اللي لمس الكورة مرتين بالعدد....
كان من دواعي الحكمة الكروية إن ريبيرو يغير قفشة قبل الشوط التاني ما يبدأ ....وبالفعل خرج قفشة وشكري اللي مكانش كويس ولا كان وحش في نفس الوقت ونزل طاهر وكريم فؤاد ....استدعى التغيير دا إن طاهر يروح مكان زيزو في الجناح اليمين وزيزو يروح مكان قفشة في الوسط بجوار بن رمضان وبدأت الدنيا تتعدل نسبياً....وبعد أربع دقايق سجل أحمد رضا هدف الأهلي الأول بضربة رأس من كورنر لعبه زيزو....
بدأ الأهلي يضغط أكتر بعد الهدف وزادت سرعة تحركات الخط الأمامي بتبادل المراكز بين طاهر وتريزيجيه وظهرت خطورة زيزو في مركزه الجديد ولاحت له فرصة تسجيل التاني لكن ابو جبل أنقذ التسديدة بثبات ....
وعلى عكس المتوقع وفي د58 وفي تقدم هجومي نادر لمودرن مرر آدم رجم كرة خبيثة لحسام حسن في ضهر مدافعي الأهلي وسدد بقوة على شمال شوبير لإن كريم فؤاد كان مغطي الأوفسايد ...
سادت حالة من الفوضى في صفوف الأهلي وأحرز علي الفيل هدف مودرن التاني من رأسية تشبه هدف أحمد رضا....واتكهربت الدنيا ودفع ريبيرو بجراديشار بعد ما كان دفع ببن شرقي وكوكا مكان رضا وتريزيجيه....وفي د 78 ومن ركنية لعبها زيزو نجم اللقاء الأول أحرز ياسين مرعي هدف التعادل برأسية برضو تشبه رأسية أحمد رضا وعلي الفيل "لا تخرج قبل أن تقول سبحان الله "....
حاول الأهلي استغلال الحماس الجماهيري بعد هدف التعادل وصنع زيزو أخطر فرصة من الجناح الشمال "فاكر لما قلنا تبادل المراكز"....وطار بن رمضان عالكورة بدماغه لكن للأسف نشن في عارضة أبوجبل ....وانتهت المباراة بتعادل غير مرضي لجمهور الأهلي.