محمد علي رزق: "ابني بيزعقلي كتير وخلاني جبان جدًا" (فيديو)

كشف الفنان محمد علي رزق، التغيير الجذري الذي طرأ على شخصيته بعد أن أصبح أبًا، مؤكدًا أن ابنه "يحيى" غيّر الكثير من طباعه وجعله يعيد النظر في سلوكياته وتعامله مع نفسه ومع من حوله.

"كنت عصبي.. ويحيى خلاني أهدى"

قال محمد علي رزق خلال ظهوره في بودكاست مع شريف إدريس عبر “تليجراف مصر”: "اتغيرت 180 درجة، أنا شخص عصبي، لكن طول الوقت في وجود يحيى بحاول أكون هادئ، مش عاوز أعوده إنه لما يتضايق يتصرف بعصبية، لأن دي صفة أنا عارف إنها وحشة، فبحاول أعالجها طول الوقت".

وأضاف رزق: "بنتقي ألفاظي، بنتقي أسلوبي، وبحاول أكون أب وصديق ليه من أول يوم".

"مش عاوز ابني يتحرم من اللي أنا اتحرمت منه"

وتابع رزق: "في حاجات اتحرمت منها مع أهلي، ومش عاوز يحيى يتحرم منها، مش عاوز الشغل ياخدني منه، أنا عارف إن أبويّا زمان كان بيبعد عننا بسبب الشغل، وكان ده غصب عنه، وأنا مش عاوز أكرر ده".

"كنت بتريق على اللي بيربوا.. وبقيت مكانهم"

وقال شريف إدريس مبتسمًا: "هو أنا ليه بفتح معاك الموضوع ده، لأن محمد علي رزق من الناس اللي كانت دايمًا بتتريق عليا وتتنمّر عليا، كنت بتتريق عليّ جدًا، وده كان بيحصل طول الوقت! لدرجة إنه كان بيقعد يغنيلي وأنا لسه صاحي من النوم على صوت البيبي، بفطم وبرضع".

ورد محمد علي رزق مازحًا: "أنا كنت بمسك الببرونة وبرضع يحيى، وبعمل كل حاجة تقريبًا.. إلا الغيار، دي الحاجة الوحيدة اللي اعتذرت عنها كنت ناوي أعملها، بس لما جيت أنفّذها.. اعتذرت!".

"وقت يحيى مقدس.. وبجيبه معايا التصوير"

وعن التزامه بقضاء وقت مع ابنه رغم انشغالاته الفنية، قال: "لازم يبقى فيه وقت ليحيى حتى لو كنت تعبان أو مجهد، بلعب معاه وبقعد وبكون متواجد، ولو الشغل أخدني، بجيبه معايا لوكيشن التصوير، ولو عدى يومين من غير ما أشوفه، بتعب جدًا، ببقى متضايق ومتوتر ومش على بعضي".

"يحيى علّمني أخاف.. وغير فيّ كتير"

وأكد رزق، أن الأبوة أعادت تشكيل مشاعره وطريقة تفكيره: "يحيى خلاني جبان جدًا. بقيت أخاف على نفسي زمان كنا بندخل على الدنيا بصدر مفتوح، بقلب ميت، دلوقتي لأ.. بقيت بحس بالمسؤولية والخوف، ودي حاجة عظيمة".

وأضاف: "هو بيربيني فعلًا، وأنا نفسي أربيه وأنا بتربى لسه مرحلة إنه يربيني مجتش، بس بيزعقلي كتير، ودي لوحدها تربية".

"نورين.. أم عظيمة ودعوة مستجابة"

وفي ختام حديثه، وجه محمد علي رزق، رسالة امتنان لزوجته "نورين"، قائلًا: "نورين، ربنا يبارك فيها، أم عظيمة جدًا، أنا فرحان إنها أم ولادي، ودي دعوة من أمي اتحققت إن نورين تبقى أم أولادي، بأمانها ومسؤوليتها".