مصور حادث طريق الواحات: "عملت كده عشان أجيب حق البنات"

في تطور جديد بحادث طريق الواحات الذي أسفر عن إصابة عدد من الفتيات، ظهر مصور الواقعة لأول مرة، كاشفًا تفاصيل اللحظات التي تلت الحادث، والمشهد الصعب الذي شهده على الطريق.

أول ظهور لمصور فيديو واقعة الواحات

وفي تصريحات خاصة لـ"تليجراف مصر"، قال مصور الحادث محمد أبو زيد: "الولاد اللي كانوا سايقين العربيات كلهم صغيرين جدًا، ومكنتش متخيل إنهم يعملوا حادثة، وأول ما حصلت الحادثة، نزلت بجري أنا والناس اللي كانت ماشية على الطريق، وكان في عمال واقفين جريوا معانا، والمشهد كان صعب، لأن في بنت منهم الإزاز بتاع العربية دخل في وشها وكانت بتنزف، وخدناهم وجرينا بيهم على المستشفى، وفضلت معاهم للنهاية لو احتاجوني في شهادة أمام جهات التحقيق".

مكنتش متخيل يخلوا البنات تعمل حادثه

وأضاف: "مكانش في إيدي أعمل حاجة غير إني أوثق اللي حصل وأجيب حق البنات، ومكنتش متخيل الموضوع هيوصل لحادث، وبعد التصادم جريت أنا وناس تانية وطلعنا البنات من العربية بالعافية وهما مصابين، وروحت معاهم المستشفى ومسبتهمش".

وفي نفس السياق، كشفت رنا، إحدى الفتيات المصابات في حادث طريق الواحات بمدينة أكتوبر، تفاصيل صادمة عن اللحظات التي سبقت الحادث، مؤكدة أنها تعرضت للمطاردة والتهديد بالقتل قبل اصطدام سيارتها بسيارة أخرى متوقفة على الطريق.

أول تعليق من ضحايا حادث طريق الواحات 

وقالت رنا في تصريحات خاصة لـ تليجراف مصر: “كنت قاعدة في الكافيه أنا وصحابي، وبعد ما شربنا القهوة وخرجنا، لقيت 3 عربيات طالعين ورايا ومحاوطني”، مشيرة إلى أنها شعرت بتوتر وخوف شديدين، خاصة بعدما بدأ أحد المتهمين في تهديدها قائلًا: "اقفي يا بت اقفي هموتك"، واستمر في ملاحقتها وإلقاء أشياء على سيارتها حتى فقدت السيطرة واصطدمت بسيارة كانت متوقفة على الطريق

إصابات خطيرة

وأضافت: "الناس خرجونا من العربية وإحنا متبهدلين وهدومنا متقطعة بسبب الحادث، وأنا حصلي ارتجاج في المخ وجروح في رجلي ودماغي، وصحبتي اتصابت زيي، أما صحبتنا التالتة فالحمد لله محصلهاش حاجة لأنها كانت راكبة ورا".

شكرا لمصور الفيديو

ووجهت رنا الشكر لمصور الفيديو الذي وثق الواقعة ولم يتركهن لحظة، مؤكدة: "فضل معانا طول اليوم، وعملنا محضر، ومش هنسيب حقنا، وعندنا ثقة في القضاء المصري".