نجوى فؤاد لوزير الثقافة: معاشي 600 جنيه ومعنديش بيت

ناشدت الفنانة نجوى فؤاد وزير الثقافة، الدكتور أحمد فؤاد هنو، بضرورة الالتفات إلى أوضاع الفنانين والفنانات الذين كرّسوا حياتهم لمسيرة فنية طويلة ومهمة، إلا أنهم لا يزالون يتقاضون مبالغ ضئيلة للغاية.

مناشدة نجوى فؤاد لوزير الثقافة

وقالت نجوى فؤاد خلال مداخلة هاتفية عبر برنامج “بنظرة تانية”: “نداء لوزير الثقافة إنه ينتبه لينا الفنانين اللي عملوا مشوار كبير وبياخدوا ملاليم.. عايزين نعيش عيشة آدمية ومش عايزة أقعد في دار مسنين ومعنديش بيت مِلك والأدوية والدكاترة بقوا غاليين”.

وأضافت فؤاد: “بدور على مشروع صغير لأن معاشي 600 جنيه في الشهر، دول ميجيبوش عيش، هدور على حاجة أشتغلها، قضيت عمري كله في المشوار الفني، مع الناس اللي حبتني، هسعى على شغل واللي يدور يلاقي، والأعمار بيد الله محدش عارف عمره إمتى”.

مرض نجوى فؤاد

وفي وقت سابق، كشفت نجوى فؤاد في تصريحات خاصة لـ“تليجراف مصر” تفاصيل تعرضها لوعكة صحية عقب سقوطها أرضا فجأة: “وقعت فجأة على جنبي الشمال، وما حسيتش بأي حاجة، ومشوفتش قدامي، ومعرفش ايه اللي حصل، وحصل لي كسر في دراعي عن المفصل والكوع واتجبست”.

وتابعت نجوى فؤاد: “كانت واقعة جامدة جدًا فوق ما حد يتخيل على البلاط والرخامة، والحمد لله إن دماغي ما اتفتحتش، وبنات البيت اللي لحقوني، وحاليًا بأخد مسكنات وهفك الجبس بعد 3 أسابيع”.

وأضافت: "فيه فنانين كتير اتصلوا اطمنوا عليا، ومنهم النقيب أشرف زكي وحرمه روجينا، وأتمنى دعواتكم تعدي الفترة دي على خير".