طليقة البلوجر علاء الساحر: "كان بياخد مني المصحف وأنا بقرأ قرآن" (فيديو)

خرجت وصال طليقة البلوجر علاء الساحر، عن صمتها بعد انتشار مقطع فيديو يظهر خلاله البلوجر أثناء اختطاف أحد الأشخاص وتقييده بحبل والتعدي عليه بالضرب داخل شقة.

عرفت إني مش عايشة مع بني آدم 

وقالت وصال طليقة البلوجر علاء الساحر، خلال بث مباشر لـ"تليجراف مصر": “أخدت قرار الانفصال عنه علشان اكتشفت إني مش عايشة مع بني آدم طبيعي، وعرفت إنه بينصب على الناس، وبيستدرج البنات من خلال ادعائه بعمل انترفيو داخل شقة، وبيدخل للبنت من خلال إنتي زي أختي وغيري لبسك علشان مش كويس، وبيبدأ يصطاد فريسته ويطلب منهم صور وبعد كده يبتزهم بيها وبياخد منهم فلوس علشان مينشرش الصور دي”.

شوفت فيديو مصوره لواحد وهو بيضربه  

وأضافت وصال: “كل فترة بلاقي حد بيكلمني يقولي علاء ناصب عليها في فلوس، وواجهته بالكلام ده وكان بيقولي أنا عندي أكونتات فيك كتير، وفي مرة وهو قاعد بيقلب في الصور شوفت فيديو مكتف فيه ولد وبيضربه، ولما سألته إنت بتعمل ليه في الواد ده كده قالي أصل الواد ده بيشهر بيا وبيقول عليا إني شاذ”.

عرفت إنه متجوز ريم عرفي

 وأكملت طلقية البلوجر: “شوفت معاه مشاكل كتير لغاية في الآخر لما عرفت إنه على علاقة ببنت اسمها ريم وهنا قررت إني انفصل، قولت لنفسي إيه اللي يخليني أستحمل إنسان زي ده، وقررت أرفع قضية خلع وقولت لنفسي مش عاوزة منه حاجة غير إني أنهي علاقتي بيه، وبعدها بيوم لقيته منزل فيديو ليه هو وريم وبيقول إنها مراته وإنها حامل وأنا مكنتش أعرف إنه متجوزها، وعرفت إنه متجوزها عرفي وخليت المحامي وقف قضية الخلع لغاية لما أفهم في إيه”.

مينفعش أتكلم عنه وأنا على ذمته 

وأوضحت طليقة الساحر: “رفضت أتكلم وأنا على ذمته علشان مينفعش أتكلم عليه وأنا معاه، ومبحبش أتكلم في حاجة غير لما يكون معايا مستند قانوني، ولقيت عدد من البلوجرات بعتولي فيديوهات من أول ما علاء أخد الولد في شنطة العربية، وريم طلعت بعدها في فيديو وقالت إن أنا اللي اتكلمت وعملت كده علشان أشوه سمعة علاء، وقالت في الفيديو إن الشخص ده كان خاطفها وعلشان علاء جوزها كان لازم يجيبه وياخد حقه منه”.

الشاب ضحية علاء كان بيبعد بنت عنه  

وأضافت طليقة علاء الساحر: “اكتشفت من الفيديو ده إن فيه بنت من ضحايا علاء الولد ده بعدها عن طريق علاء وعلشان كده هو خطفه وعمل فيه كده علشان يعرفه طريق البنت، ولغاية دلوقتي الولد ده محدش يعرف هو فين ولا يعرف عنه أي حاجة”.

كان مأجر فيلا بيستدرج فيها البنات 

وأكملت طليقة البلوجر: "اكتشفت إن علاء كان مأجر فيلا بيستغلها لاستدراج الفتيات والتعدي بالضرب على بعض الشباب، وأنا ماشية في موضوعي بالقانون والجهات المختصة هي اللي هتجيبلي حقي، وأنا كل هدفي أن الأجهزة الأمنية تاخد إجراء ضد علاء علشان ده بلطجي وعليه أحكام كتير، بناشد وزارة الداخلية تاخد حقي وتاخد حق الشخص المخطوف ده قبلي لأنه حبسه في الشقة 3 أيام متواصلين.

كان بياخد من إيدي المصحف 

وأختتم وصال حديثها لـ"تليجراف مصر": “أنا كنت ببقى قاعدة في رمضان بقرأ قرآن وكان بييجي يشد من إيدي المصحف ويقولي ابقي كملي بعدين، وهو من زمان كان بيعتدي عليا وبيعنفني، وحسن شقيق علاء كلمني وقالي إنتي عاوزة إيه من علاء وقولتله أنا عاوزة حقوقي بس، ولو حسبناها هنلاقيها أكتر من مليون جنيه وقالي طيب نديكي 100 ألف بس وملكيش قايمة، وريم كلمتني وقالتلي ارجعي لعلاء وأنا وانتي نبقى صحاب ونكبر الأكونتات بتاعتنا ونبقى ترند، قولتلها أنا مش عاوزة ترند أنا عاوزة حقوقي فقط، وعلاء أخد منها التليفون وقالي إنتي شايفة إني نصاب قولتله آه أنت نصاب”.