"لابسين مش كويس وضحكولنا".. أقوال المتهم في مطاردة فتيات الواحات (خاص)

حصلت “تليجراف مصر”، على نص التحقيقات في قضية حادث فتيات طريق الواحات، والتي قام فيها 4 شباب بالتسبب في اصطدام سيارة بداخلها 3 فتيات بسيارة نقل متوقفة بجانب الطريق.

وحصلت “تليجراف على أقوال المتهم الثاني “مهند ج”، وجاء في نص التحقيقات:

س: ما قولك فيما هو منسوب إليك بالتعرض للمجني عليهم؟  

ج: محصلش مننا أي إيحاءات جنسية ولا ضايقناهم

س: ما قولك فيما هو منسوب إليك بالتسبب في إتلاف السيارة المملوكة للمجني عليها؟

ج: محصلش

س: ما تفاصيل حدوث الواقعة محل التحقيق؟

ج: اللي حصل أني طالب في كلية هندسة ورايح الجامعة بتاعتي وكلمت صحابي لقيتهم برة قولت أروح أقعد معاهم قعدنا في “سيركل كيه” وفضلنا قاعدين لحد 6.10 صباحا، وبعدين وإحنا بنركب العربية شوفت 3 بنات لابسين لبس مش كويس وبيركبوا عربيتهم، فعادي قولنالهم جايين في سباق نشد سوا بالعربيات، ضحكوا ومحدش مننا اتسابق معاهم ولا حاجة ولما عملوا حادثة أنا ركنت عربيتي وروحت طلعت واحدة منهم واطمنت عليها. 

س: أين تراخيص سيارتك؟ 

ج: الرخصة لوالدي والرخصة في البيت ومحدش طلبها. 

س: ما دعاك للتحدث بهذه اللهجة مع الفتيات؟

ج: دي كلمات عادية بنقولها كشباب مش قصدي حاجة وحشة أنا بقول نسابق بعض عادي.

س: ما سبب عرضك عليهن ذلك؟

ج: عادي شباب مع بعض وكنا هنشد شوية بالطريق وخلاص وحتى هما ضحكوا متضايقوش وخلاص.

س: ما هي الحالة التي كانت تسير عليها سيارة المجني عليها؟

ج : هي كانت ماشية عمالة تقلب نور، وأنا عمومًا مكنتش مركز معاهم قوي.

س: ما الحوار الذي دار بينك وبين أي من المجني عليهن؟

ج: لا خالص مكلمتش حد منهم.

س: من المتسبب في حدوث ذلك الاصطدام؟

ج: معرفش ممكن هي سرحت وهي سايقة.