"حاصرونا بـ3 سيارات".. ضحية طريق الواحات تكشف تفاصيل "15 دقيقة مطاردة"

نزال ضحية مطاردة طريق الواحات

A . .A

حصلت “تليجراف مصر”، على نص التحقيقات مع “نزال” إحدى ضحايا واقعة مطاردة الفتيات بطريق الواحات، التي أثارت ضجة كبيرة خلال الأيام القليلة الماضية، وتسبب خلالها 4 شباب في اصطدام سيارة بداخلها 3 فتيات بسيارة نقل متوقفة بجانب الطريق.

وجاءت أقوال “نزال” في التحقيقات كالتالي:

س: ما تفصیلات شكواك؟

ج: انا كنت في البيت وكلمتني رنا عشان حفلة تخرجها 2025/8/21 وكانت عايزة تنزل تشتري حاجات التخرج فكلمتني امبارح 2025/8/13 الصبح قالتلي تعالي ننزل نشرب حاجة، وعدت عليا بعربيتها ونزلنا روحنا سيركل كيه اللي في بنزينة “شيل أوت” في الحي الأول، وبعد كده قعدت أنا وهي جوة الماركت، وأول ما دخلنا البنزينة كان اللى برة شباب، وقولنا نقعد جوا أحسن، وطلبنا حاجة وقعدنا عادي.

الشباب اللي كانوا قاعدين الناحية اليمين، وإحنا داخلين نقلوا وقعدوا قدامنا، وإحنا كنا قاعدين على الزجاج وباينين ليهم، وقولنا للولد اللي شغال عايزين نبقى مش باينين ليهم، ونزلنا الستاير خلانا منبقاش بابنين ليهم وعلشان نبقى قاعدين براحتنا.

في واحدة عارفة رنا بس مش صحاب أوي، كلمتها قالتلها إنتي فين وقالتها على مكاننا فقالتلها هجيلكم وجت فعلا قعدت معانا شوية، واسمها حبيبة ومنعرفش أي معلومات عنها هي معرفة سطحية، فلما وصلت العمال اللي في المكان طلبوا مننا نطلع نقعد برة عشان هيمسحوا الأرض جوا المكان.

طلعنا برة وأخدنا ترابيزة على جنب محدش حوالينا وطول ما إحنا جوا مكانوش بيضايقونا الشباب اللي برة، كانت نظرات بس، ولما طلعنا برا كان النهار بدأ يطلع، وجايين نمشي ورنا دورت العربية راحوا هما قاموا ودوروا عربياتهم واتحركوا هما الأول قبلنا، ومجاش في بالنا إنهم جايين ورانا لحد ما كنا على طريق الواحات لقيناهم الـ3 عربيات ورانا، وقولت لرنا اهربي منهم واجري عشان نتوه منهم، فراح الولد اللي راكب عربية بي إم دابليو جه ناحية اليمين وأنا كنت قاعده جنب رنا وهي سايقة وبيقولنا إنتو رايحين فين اقفوا طيب تعالوا نقعد شوية، طب اركنوا على جنب، طب تعالوا امشوا ورانا، فقولت لرنا صاحبتي اقفلي الزجاج وسيبك منهم.

هي كانت عمالة تهرب منهم ناحية الشمال في الآخر، وبتاع البي إم على اليمين ومعاه واحد كمان بعربية جنبه، وورانا عربية كيا، وهيا دايسه فرامل وبسبب السرعة وإحنا بنهرب منهم ملحقتش توقف العربية وخبطنا ومكانش في دماغنا إننا ممكن تخبط أصلا، وفضل بتاع البي إم دابليو جنبنا وشايف إن في عربية نقل قدامنا على الطريق، واتزنقنا منعرفش نتحرك ومفيش قدامنا غير إننا نطلع على الرصيف أو خبط في العربية النقل أو نخبط فيه هو، فخبطنا في العربية النقل.

أول ما خبطنا هما طلعوا يجروا كلهم، أنا اتصابت أنا ورنا بس حبيبة محصلهاش حاجة، ولقيت وشي كله دم وإيدي محشورة في الاكصدام، وعلشان أطلعها قطعت هدومي وكتفى عريان بسبب إني قطعت اللبس عشان أعرف أطلع والطرحة اتقطعت وشعري اتكشف، فكلمنا صحابنا عشان يجوا يلحقونا.

وقفت لينا واحدة وأخدتنا على المستشفى، فأنا كنت بدور على الموبايل ولما لقتني بدوخ قولت لازم أركب مع الست اللي وقفت عشان نروح المستشفى وملقتش حاجتي وروحت على مستشفى 6 أكتوبر المركزي وعملنا أشعة إحنا الثلاثة وفضل يتاكد إذا كان فيه كسور ولا لأ.

وقالولنا في المستشفى الحمد لله مفيش كسور، والحمد لله طلعت منها على خير، بس قالي لازم أروح مستشفى زايد التخصصي لدكتور تجميل، فروحت زايد التخصصي وكلمت أهلي من تيلفون الست اللي ودتنا المستشفى وهما اللي جم أخدوني من المستشفى وودوني زايد التخصصي، وأول ما وصلت غيرت هدومي عشان كانت متقطعة، ودكتورة التجميل لما شافتني قالت الحمد لله خدوش مش هحتاج تحميل وقالتلي الزجاج اللي في وشي مش هنشيله علشان يقع لوحده عشان متعملش حفر في وشي، ورجعت على البيت نمت شوية ونزلت القسم عشان أعمل محضر وجبت التقارير الطبية ورفقتها مع المحضر لحد ما جيت على النيابة.

س: متى وأين حدث ذلك تحديدًا؟

الكلام ده حصل يوم 2025/8/13 حوالي الساعة 6:30 الصبح على طريق الواحات، إحنا نزلنا من البيت تقريبًا الساعة 5:00 ووصلنا الكافية حوالي 5:30 صباحًا,

س: وما هو سبب ومناسبة تواجدك بالمكان والزمان سالفي الذكر؟

ج: كنت خارجى أنا وصاحبتی رنا علشان عندها حفلة تخرج وعايزة تجيب طلبات.

س: وما كيفية مقابلتك مع صديقتك المجني عليها/ رنا إبراهيم فوزي؟

ج: هي كلمتني في التليفون وهي ساكنة معايا في نفس المنطقة 247 عمارة حدائق أكتوبر وقالتلي إنها هتعدي عليا بالعربية وجت فعلًا وأخدتني.

س: وما وجهتكم؟

ج: إحنا قولنا نروح على بنزينة شيل أوت اللي في الحي الأول ونقعد في سيركل كيه نشرب حاجة وفعلا روحنا هناك.

س: وما الذي حدث بعد ذلك؟

ج: إحنا وصلنا وإحنا داخلين لقينا الدنيا زحمة برة وفيه ناس كتير وكانت في ترابيزة على اليمين وإحنا داخلين عليها مجموعة الشباب اللي مشيوا ورانا.

س: وما عددهم تحديدًا؟

ج: حوالي 8 شباب تقريبا مش عارفة بالظبط لأنه مبصيناش عليهم أوي؟

س: وأين قمتم بالجلوس تحديدًا داخل المقهى الموجود بمحطة الوقود سالفة البيان؟

ج: إحنا دخلنا لما لقينا في شباب كتير برة قلنا نقعد جوا أفضل على البار اللي هو بيبقي على الزجاج وطلبنا حاجة نشربها.

س: وأین استقريتم تحديدًا؟

ج: قعدنا على البار اللي على الزجاج ناحية الشمال عشان نبقى عكسهم.

س: وما الذي بدر من الشباب السالف الإشارة إليهم؟

ج: هما قاموا وراحوا جايين ناحية الشمال قصادنا علشان إحنا كنا على الشمال.

س: وما الذي بدر منكم عقب ذلك؟

ج: إحنا طلبنا من العمال إننا ننزل الستارة اللي على الإزاز عشان منبقاش باينين ليهم.

س: وما الذي جعلكم تقدمون على ذلك؟

ج: لانهم لما جم قعدوا قدامنا بدأوا بيصوا علينا وإحنا قلنا نقفلها خالص عليهم.

س: وهل من ثمة أفعال أو إشارات أو عبارات أو إيحاءات صدرت منهم آنذاك؟

ج: لأ كانت بصات بس وحاجات من دي.

س: وما طبع تلك النظرات تحديدا؟

ج: هما كانوا بيبصوا لينا ويضحكوا مع بعض ويتكلموا.

س: وهل كنتم المقصودين بتلك الأفعال؟

ج: ايوة كانت باينه جدًا إنها لينا لأنه بيكلم صاحبه ويبصلنا ويضحك ويفضل باصص لينا.

س: أمام من حدث ذلك؟

ج: الموجودون بالمكان.

س: وهل كانت تلك الأفعال لشخص واحد منكم على وجه التحديد؟

ج: لأ لينا كلنا.

س: وما عددكم تحديدًا انذالك؟

ج: إحنا كنا تلاتة أنا ورنا صاحبتي وواحدة صاحبة رنا من بعيد اسمها حبيبة.

س: متى قمتم بمغادرة المكان تحديدًا؟

قعدنا حوالي نص ساعة ومشينا الساعة 6:00 صباحًا تقريبًا

س: وما سبب مغادرتكم حينها؟

ج: بسبب الشباب قولنا نمشي ونروح نجيب حاجة من بيت رنا صاحبتنا.

س: وما الذي حدث عقب ذلك؟

ج: روحنا للعربية ورنا دورت العربية وأنا ركبت جنبها وحبيبة ورا وهم قاموا أول لما شافونا قومنا.

س: وهل من ثمة أفعال صدرت منهم إيان مغادرتكم المكان؟

ج: لأ بس هم قاموا ورانا على طول لما شافونا ماشيين

س: وما بدر منهم عقب ذلك؟

ج: لما دورنا العربية هم دوروا عربياتهم واتحركوا قبلنا.

س: وما كانت وجهتهم إنذاك؟

ج: هم طلعوا من البنزينة وركنوا في البطيء وإحنا شوفناهم بس ساعتها معملوش حاجة كانوا راكبين عربياتهم عادي اتنين منهم واقفين في البطيء وواحد في الشمال وإحنا أخدنا طريقنا عادي.