الفشني: "الفن اللي بيرتقي الذوق حلال.. وبقيت عامل زي الكحلاوي"

كشف المطرب وائل الفشني، كواليس بداياته في الغناء، وذكرياته مع جده الذي كان يرفض دخوله إلى المجال الفني.

وقال وائل الفشني، خلال لقائه في بودكاست “فايق ورايق” مع إبراهيم فايق، :"الفن الحلو المحترم اللي بيرتقي بالذوق حلال، والمدح لسيدنا النبي أنا بحبه، والناس عارفه ده كويس، فأنا بقيت عامل زي مولانا الشيخ الكحلاوي".

وتابع: "الناس قابلين مني الكلمة الحلوة في الحب، وفي الدراما، وقابلين إني أمدح في سيدنا النبي، واللي بيعمل ده وقابلين منه اسمه وائل الفشني، والناس بتقولي بتحب المطرب ولا المدّاح، بقولهم بحب وائل الفشني".

 الطفل المعجزة 

وأضاف الفشني: "اتقال عليا الطفل المعجزة لفترة طويلة، وكنت هغني قدام المحافظ، وجدي كان شديد، وعم فاروق الفراش في المدرسة هو اللي اكتشفني، وراح يقول لجدي علشان يقنعه إن المحافظ عايز حفيدك قالوا عايزه ليه، ميعرفش عني إني كنت مطرب وصوتي حلو، وأدوني شهادة استثمار بـ10 جنيه".

محفظتش القرآن كله

واستكمل: "في الدراسة كنت بحب العربي والدين والتاريخ بس، وكنت شاطر فيهم بسبب القرآن، ومحفظتش القرآن كله للأسف، وأنا حابب الفن والمزيكا، وجدي التاني كان عنده أم كلثوم مقدسة، وعم فاروق اللي اكتشفني لما كنت بغني في المدرسة قالي إنت فنان وموهوب، واتشهرت في البلد في الفترة ديه".

وائل الفشني

ويعد وائل الفشني واحدًا من أبرز المطربين والمنشدين في الفترة الأخيرة، وقدم العديد من الأغاني الناجحة ومنها، "عم غريب، مولاي، أدعوك، المسك فاح، ومالي سواك"، إلى جانب تترات المسلسلات التي حققت له نجاحًا جماهيريًا كبيرًا، منها "واحة الغروب"، "طايع"، "الحشاشين"، و"بيت الرفاعي".