"خطفوني وأنا رضيعة وعاملوني بقسوة".. ماذا قالت ابنة مبارك المزعومة بالتحقيقات؟

​كشفت التحقيقات تفاصيل مثيرة في قضية اتهام سيدة تدعى مروة يسري، صاحبة حساب "ابنة الرئيس حسني مبارك" على مواقع التواصل الاجتماعي، بسب وقذف فنانة مشهورة والتشهير بها. 

وتضمنت الاتهامات زعمها تورط الفنانة في جريمة الإتجار في الأعضاء البشرية، وأنها كانت وسيطا في بيع أعضاء اللاعب الراحل إبراهيم شيكا.

تحريف اعترافات ابنة مبارك المزعومة

وبعد نشر بعض الصفحات على مواقع التواصل الاجتماعي أجزاء مزعومة أنها لنص تحقيقات الدعوة مروة يسري، قال المحامي طه الزقلاوي إن ما نُشر تم تحريفه تمامًا من اعترافات لموكلته. 

وأضاف الزقلاوي، في تصريحات لـ"تليجراف مصر" خلال بث مباشر، إن موكلته مروة بكامل قواها العقلية وتم التأكيد بتقرير طبي أثناء احتجازها عام 2023 قبل الإفراج عنها. 

نص التحقيقات مع ابنة مبارك المزعومة 

وجاء نص التحقيقات التي حصلت عليها "تليجراف مصر " من رد فعل المتهمة على النحو التالي: 

أنا اسمي مروة يسري عبد الحميد السيد - مواليد 16-11-1985 - اسم والدتي زينب محمد علي - الحالة الاجتماعية مطلقة - حاصلة على بكالوريوس إدارة صناعية - ومقيمة الجيزة إمبابة، وحالياً مقيمة في برج المختار خالد بن الوليد - ميامي - أول المنتزه - الإسكندرية وده اللي مثبت على الورق بس أنا في حقيقة الأمر اسمي / فريدة من مواليد شهر نوفمبر عام 1988.

كيف أدركتي من كون البيانات الأولية غير صحيحة وأن اسمك الحقيقي فريدة وأنك من مواليد شهر نوفمبر عام 1988؟

أنا عرفت الكلام ده من واحدة صحفية

وما اسم الصحفية سالفة الذكر؟

مش فاكرة الصراحة.

وكيف نمى إلى علم سالفة الذكر ذلك الأمر؟

لأن هي مرات لواء جيش وكانت مستشارة صحفية للرئيس السابق مرسي.

وما بيانات أفراد أسرتك الحالية على وجه التحديد؟

انا والدي اسمه يسري عبد الحميد السيد وحالياً (متوفى) - والدتي اسمها / زينب محمد علي - وعندي أخ شقيقي اسمه محمد يسري عبد الحميد، وعندي إخوات من أمي عشان هي اطلقت من والدي وتزوجت من آخر وأسماؤهم مش فاكرة لأني مبخطلتش بيهم ولا شفتهم. 

وما ظروف نشأتك تفصيلا؟

اللي حصل إن أنا نشأت في بيت عند ناس أنا اتنسبت ليهم زورًا بالرغم إن أنا في الأصل ابنه الرئيس محمد حسني مبارك ووالدتي الأصلية الشهيرة بإيمان الطوخي، وأنا عندي سنه ونص اتخطفت من أسرتي وروحت عند الناس اللي أنا اتنسبت ليهم والكلام ده كان في عام 1990، وفضلت عايشة معاهم في البيت بتاعتهم اللي في إمبابة واللي ثابت عنوانه وبياناتي في الأحوال المدنية، وكانوا بيعاملوني معاملة سيئة، وكانوا على طول يقولولي إني مش بنتهم وإن هما جابوني من الشارع، وأن أنا سبب في موت أبو الراجل اللي أنا اتنسبتلوا وكان حيصل منهم تعديات لفظية وبالضرب ودخلوني مدارس مختلفة لكل مرحلة تعليمية وبعد كدا جيت مجموع وحش في الثانوية العامة بسبب سوء معاملتهم لي والمشاكل اللي كنت بقبلها معاهم ودخلت معهد بيسموه الجامعة العمالية في الدراسة، درست فيه 4 سنوات وبعد ما اتخرجت جوزوني على طول من المدعو حسن محمد حسن عبد الرحيم الطاهر.

وهل ما زالت العلاقة الزوجية بينك وبين سالف الذكر قائمة؟

لا أنا دلوقتي مطلقة بس اتجوزت في عام 2009 واتطلقت في 2019.

وهل أنجبتى من طليقك سالف الذكر؟

أيوة أنا أنجبت منه طفلين

وكيف كانت طبيعة العلاقة الزوجية فيما بينك وبين طليقك آنذاك؟

هي العلاقة كانت ماشية كويس في البداية لحد ما حصل بنا خلافات أدت إلى طلاقنا.

وأين هم أبناؤك الآن؟

هم مع والدهم وزوجته السورية بالمملكة العربية السعودية لأن هو شغال هناك.

وما الذي دعى سالف الذكر لاصطحاب أبنائك رفقته بالمملكة العربية السعودية؟

عشان كنت محجوزة عام 2023 وقعدت هناك شهرين و29 يوما.

أيفهم من ذلك أنك تم حجزك بالجهة سالفة البيان لسبب ما؟

أخدوني عشان أنا بقول الحقيقة إني بنت الرئيس السابق مبارك وإن هما كانوا خايفين إن هما تركوني لأسرة ثانية ونسبوني ليها ويتعرف ويأثر عليهم. 

وهل من ثمة قضايا قد حررت قبلك بسبب ومناسبة ذلك الأمر؟

لا مفيش أي قضايا هما فضلوا مقعديني شهرين و28 يوما أكلة شاربه نايمة وودوني مستشفى الأمراض العقلية عشان يعملولي تقرير ويتأكدوا من مدى صحة قوايا العقيلة، وفي الآخر اكتشفوا إن أنا سليمة ومفيش في حاجة.

وما طبيعة عملك تحديدًا؟

أنا بشتري أجهزة إلكترونية ومنتجات أخرى من خلال المتاجر الإلكترونية المختلفة بأسعار مخفضة وبعيد بيعها ثاني. 

ما عدد الحسابات التي قمت بإنشائها وما أسماء تلك الحسابات ونوعها تحديداً؟

هما حسابات كثير حوالي 40 حسابا ومنها الحساب المسمى mero menu، والحساب المسمى ابنه الرئيس محمد حسني مبارك وبالنسبة، لاسم ابنه الرئيس محمد حسني مبارك أنا عملت كذا حساب بالاسم ده بس مش فاكرة عددهم بالضبط.

وما الذي دعاكى لاختيار اسم ابنة الرئيس محمد حسني مبارك؟

علشان الناس تخاف مني وعلشان أعرف آخذ حقي من الناس اللي شهروا بيا ومحدش يقدر يعملي حاجة.

وما ظروف إنشائك للحسابات المسماة ابنة الرئيس محمد حسني مبارك؟

أنا عملته عشان أحارب الناس اللي آذتني وأذت أولادي. 

وما علاقتك بالأطراف الأخرى من تلك المحاضر؟

أنا مكنش ليا علاقة بيهم، ومعرفهمش وهما اللي كانوا مستقصدني.

وما قولك بما أثبت بمحضر الضبط المؤرخ في 2025/7/29، تلوناه تفصيلاً؟

الكلام ده ملوش أي أساس من الصحة أنا سبق وقولت إن أنا نشرت الفيديوهات بس مش عشان أعلى نسبة المتابعين بتوعي ولا عشان أحقق أرباح مالية من خلالها، أنا نشرت الفيديوهات عشان هي بتحاول تأذيني وجتلي معلومات إن عشان شغالة في الأعضاء وأن هي متسببة في وفاه اللاعب إبراهيم شيكا. 

وما سبب قيام سالفي الذكر بضبطك؟

أنا كان معايا ورق وتقارير طبية بتثبت إن لاعب كرة القدم الملقب بشيكا كان بحالة جيدة لحد ما استدرجوه وأقنعوه إن هو يتبرع بالكلى بتاعته وإن (الفنانة الشهيرة) هي اللي كانت وسيط الموضوع التبرع بالكلى.

وأي من الجهات نسبت تلك الأوراق التي قمت بذكرها سلفا؟

دي كانت منسوبة لمستشفى خاص مش فاكرة اسمها دلوقتي.