صبري فواز عن الطفلة هايدي ووالدها: دول آخر حاجة حلوة

علق الفنان صبري فواز، على مقطع فيديو لاقى رواجًا على مواقع التواصل الاجتماعي، لطفلة تدعى هايدي منحت 5 جنيهات ثمن كيس شيبسي كانت تود شراءه، لعابر سبيل.

وكتب صبري فواز، عبر حسابه الرسمي على منصة “فيسبوك”: "هايدي بنت جميلة وطيبة ومتربية وعملت خير، المواقع جريت عليهم تصورهم وتعمل معاهم لقاءات، ودي حاجة كويسة يشكروا عليها، والراجل أبو هايدي قال كلمة في منتهى الجمال، قال للصحفى أنا شايف إنها حاجة عادية".

وتابع: "مفيش أجمل من كده رد خصوصًا لما يكون طالع من راجل طيب شريف بيعرف يربي، ليه بقى عاوزين نشده لحواراتنا وترنداتنا وعاوزينه يفتي في حاجات مش بتاعته ولا تخصه، ياجدعان سيبوا الناس بجمالها دول آخر حاجة حلوة".

الظهور الأول لهايدي بطلة واقعة كيس الشيبسي وعابر السبيل

وكانت الطفلة هايدي ظهرت عبر بث مباشر لـ"تليجراف مصر" لتحكي عن تفاصيل الواقعة، إذ لم تكن تعلم أن ما فعلته سيكون له هذا الصدى الواسع في قلوب من رأوا مقطع الفيديو، الذي وثق إنسانيتها في موقف قد يراه البعض عابرًا لكنه كان مؤثرًا.

هايدي خرجت من منزلها لتبتاع طعام الإفطار من أحد المحال بالقرب من المنزل، خمسة جنيهات، تبقت معها كانت تود أن تشتري بها “كيس شيبسي”، ذهبت للسوبر ماركت، لتلتقط الكيس وخطت عدة خطوات حتى تسلم ثمنه لصاحب المتجر، ولكنها آنذاك رأت عابر سبيل يمر بجانبها، مرت ثوانٍ قليلة واتخذت قرارها النهائي بالتخلي عن الكيس بيديها، وتضحي بآخر خمسة جنيهات معها، لتمنحها لعابر سبيل مسن يجول الشوارع في وهن، طلبًا لسد احتياجاته.

ردة فعل والد الطفلة هايدي على الواقعة

أما عن والد هايدي والذي رأي الفيديو مصادفة، بعد انتشاره بشكل واسع عبر منصات التواصل الاجتماعي فقد قال: "شفت الفيديو بالصدفة وشايفه حاجة عادية، مش شايفه حاجة جامدة، لكن بالنسبة للي بيحصل الأيام دي من المصايب اللي بنشوفها كل يوم، فهو حاجة جامدة طبعًا".

وأضاف متحدثًا عن هايدي، وهي أصغر أبنائه: "هايدي بنتي في 6 ابتدائي بتذاكر كويس وبتنجح كل سنة، هي آخر العنقود وأطيب حد في ولادي، وبتسأل عليا دايمًا لما أغيب".

وتابع: "أنا لما شفت التعليقات على الفيديو من كتر الفرحة أنا دمعت، وقعدت ادعي لربنا إن كل دعوة تكون من نصيب بنتي، وقلت لهايدي إنتِ بعتي لربنا 5 جنيه بعتهالك 5 ملايين دعوة".

وأضاف: "وعدت هايدي وقلت لها إني هجيب لها كرتونة شيبسي بدل كيس الشيبسي اللي إدته للرجل الغلبان".