أنغام توجه رسالة صوتية باكية إلى جمهورها.. ماذا قالت؟

وجّهت النجمة أنغام رسالة صوتية إلى جمهورها، في أول رسالة لها بعد تعافيها من أزمتها الصحية الأخيرة، عبّرت فيها عن خالص شكرها وامتنانها وتقديرها لمحبتهم ودعائهم الصادق خلال فترة علاجها، مؤكدة أن هذا الدعم الكبير كان سببًا في منحها الأمل وتعزيز تمسكها بالحياة.

"فكرت أكتب لكن حسيت لازم أتكلم بصوتي"

بدأت أنغام رسالتها الصوتية، عبر صفحتها الشخصية على “فيسبوك”، وهي تبكي قائلة: “فكرت أكتب ولا أتكلم بصوتي، لكن حسيت إني محتاجة أتكلم بصوتي”.

وأضافت: “بشكر كل حد وقف جنبي ودعالي من قلبه، وكل شخص اكتشف إنه بيحبني أو حتى ما كنش بيحبني وقرر بإنسانيته وحنيته وقلبه إنه يدعيلي”.

وزادت: "بشكركم من قلبي. أنتم دعيتوا وربنا استجاب، ودعاؤكم كان هو الدواء، والإيد اللي بتطبطب، وهو اللي وقفني على رجلي بعد ربنا وبعد الدكاترة".

"مش قادرة أبطل عياط من الفرحة"

وتابعت أنغام وهي تغالب دموعها: “مش عارفة أقول إيه ولا أتكلم، ومش عارفة ما أبكيش من فرحتي، ومن الامتنان والشكر لله وليكم”.

وواصلت: "اللي مالي قلبي وموقفني على رجلي، أنتم دعيتم لأنغام، لكن كمان دعيتم لأم كانت بتتمنى تكمل حياة مع أولادها وتفرح بيهم وترجع تعيش وسطهم".

وأضافت: "أنا كان كل خوفي أسيب ولادي.. مكنتش عاوزة حاجة خالص من الدنيا غير إني أرجع لولادي".

"دعاؤكم كان أكلي وشربي ودوائي الحقيقي"

وفي جزء آخر من الرسالة، قالت أنغام: "لما شوفت دعواتكم وأنا في المستشفى، كنت بصر أفضّل مفتحة عيني علشان أقوم.. دعاؤكم كان أكلي وشربي ودوائي الحقيقي.. وسبب إن أم ترجع تعيش مع أولادها تاني".

"أنا مش خجلانة من ضعفي قدامكم"

كما عبّرت أنغام عن شعورها بالضعف خلال الأزمة، وقالت بصراحة: "عديت بمحنة صعبة وشديدة، وعمري ما كنت بالضعف ده، لكن مش خجلانة أكون ضعيفة شوية.. لأني بقيت حاسة إنكم حتة مني، ومش غلط ولا عيب الإنسان يضعف قدام أهله ويطلب منهم يستحملوه وقت ضعفه".

وأردفت: "وأنتم استحملتوني بالدعاء والمحبة اللي وصلتني على سريري في المستشفى، وكنت كل ما أقرأ كلامكم، حبكم، دعاؤكم، وأمنياتكم، كنت بصر أفضل مفتحة عنيا".

"بشكر كل اللي وقف جنبي حتى لو حرّك السرير بس"

وقدّمت أنغام شكرها لكل من دعمها، قائلة: "بشكر ولادي، وأمي، وصحابي، وإخواتي، وكل واحد ساعدني في مرضي، حتى اللي حرّك السرير بس".

“مشتاقة أشوفكم قريب على المسرح”

وفي ختام رسالتها، أعربت النجمة أنغام عن شوقها الكبير لجمهورها، قائلة: "مشتاقة أشوفكم قريب على المسرح ونتقابل ونغني ونحتفل سوا".

“جمهوري نادر الوجود”

واختتمت أنغام رسالتها بكلمات مؤثرة عن جمهورها، قالت فيها: "شكرًا لجمهوري الكبير، جمهور عظيم ونادر الوجود، ونادر يكون فيه قلوب بالجمال والصدق والحنية دي".