بعد رحيل والدتها.. مي عز الدين تكشف رفيقها الدائم في البيت

كشفت الفنانة مي عز الدين، جانبُا من أسرار حياتها الشخصية والفنية، مؤكدة أنها تتعمد الابتعاد عن الأضواء لفترات طويلة.

لا أهوى الظهور

وقالت مي عز الدين خلال برنامج "ضيفي مع معتز الدمرداش"، مع الإعلامي معتز الدمرداش: "أنا بقالي 6 أو 7 سنين ما عملتش أي حوار إعلامي، وبصراحة أنا مش من النوع اللي بيحب يطلع كتير، حتى على السوشيال ميديا أنا شبه معتزلة، يمكن بدخل مرة في الشهر وأنزل صورتين بالكتير".

تركت “إنستجرام” لأعيش حياتي

وأضافت: “في بداياتي كنت أتفاعل طول الوقت على إنستجرام، لكن دلوقتي بقيت أعيش حياتي برا الموبايل أكتر، ولو ما كنتش حاسة بحاجة مش بعملها، عشان كدا حتى جلسات التصوير اللي كنت بحبها زمان وقفتها".

وعن صورتها الأخيرة التي أثارت تفاعلًا كبيرًا، أوضحت: "الصورة كانت عادية جدًا وبلبس بسيط، لكن التفاعل جه لأني كنت غايبة فترة طويلة، والجمهور استقبلها بحب كبير".

وتطرقت للحديث عن والدتها الراحلة: "مافيش حد بيتجاوز رحيل أهله، الفقد بيعيش معانا طول العمر، ومهما مر الوقت بيبقى موجود جوانا".

أقرب رفقائي

أما عن حياتها اليومية بعيدًا عن الأضواء، فقالت: "أنا بحب الزرع جدًا وبقعد بالساعات أزرع وأهتم بالنباتات والورد، دا بيديني طاقة إيجابية مش بتتخيلها، كمان عندي قط اسمه (جوتشي) هو رفيقي الدائم في البيت".

وتابعت: "أنا من النوع اللي يعمل الحاجة بأوفر قوي أو مش يعملها خالص، يعني يا أخرج كل يوم يا ماخرجش بالشهور، وحتى في الطبخ بطبخ بس للناس الغالية عليا، مش مجرد هواية بالنسبة لي".

سر تمسكها بمصر الجديدة

واختتمت حديثها بقولها: “أنا فضلت أعيش في مصر الجديدة، مش بفكر أتنقل للتجمع أو زايد زي ناس كتير، المكان دا بيمثل لي راحة وأمان، ودا أهم من أي حاجة”.